+7 495 740-29-89
Туроператор АС-тревел
Туроператор АС-тревел

Житие и хождение
Даниила Русской земли игумена

Се аз недостойныи игумен Данил русския земля, хужши во всех мнисех, смеренный грехи многими, недоволен сый во всяком деле блазе, понужен мыслию своею и нетерпением моим, потех видети святый град Иерусалим и землю обетованную. И благодатию Божиею доходих святого града Иерусалима и видех святая места, обходих всю землю галилейскую и около святаго града Иерусалима по святым местом, кудаже Христос Бог наш походи своима ногама и велика чюдеса показа по местом тем святым. И то все видех очима своима грешныма, беззлобивый показа ми Бог видети, егоже жедах много дний мыслию моею. Братиа и отци, господие мои, простите мя грешнаго и не зазрите худоумью моему и гробости, еже писах о святем граде Иерусалиме, и о земли той блазей, и о пути еже к святым местом. Иже бо кто путем сим ходил со страхом Божиим и смерением, не погрешит милости Божия николи же. Аз же неподобно ходих путем сим святым, во всякой лености и слабости и во пьянстве и вся неподобная дела творя. Но, обаче, надеяся на милость Божию и на вашу молитву, да ми простит Христос Бог моих грехов безщисленых, да си исписах путь си и места сии святая не возносяся не величаяся путем сим, яко что добро створив на пути сем, не буди то: ничтоже бо добра сътворих на пути сем; но любве ради святых мест сих, исписах все, еже видех очима своима, дабы не в забыть было то, еже ми показа Бог видети недостойному. Убояхся онаго раба лениваго, скрывшаго талант господина своего и не створившаго прикупа им, да cиe написах верных ради человек. Да кто убо, слышав о местех сих святых, поскорбл бы ся душею и мыслию к святым сим местом и равну мзду приимут от Бога с теми, иже будуть доходили святых сих мест. Мнози бо дома суще, в местех своих добрии человеци мыслию своею и милостынею убогых, добрыми своими делы, достигають мест сих святых, иже болшую мзду приимут от Бога Спаса нашего Иисуса Христа. Мнози бо доходивше святых сих мест и святый град Иерусалим, и възнесшеся умом, своим, яко нечто добро сътворивше, и погубляють мзду труда своего, от них же первый есмь аз; мнози бо ходивше святаго града Иepyсалима, пойдут опять, много добра невидевши, тщаще опять вскоре, а сего пути нелзе вскоре сотворити ни истоком тог …….. И вся святаа та места и в граде и вне града.

Житие и хождение Даниила Русской земли игумена

О Иерусалиме о Лавре

Аз недостои игумен Данил, пришед в Иерусалим, пребых месяц 16 в месте в лавре святаго Савы и тако могох походити и испытати вся святая си места. Невозможно бо без вожа добра и без языка испытати и видети всех святых мест. И что имея в руку моею худаго моего добыточка, то от того все подавах ведущиим добре вся святаа места в граде и вне града, да быша ми указали все добре, якожь и бысть. И пригоди ми Бог налести в лавре мужа свята и стара деньми, и книжна вельми. Тому святому мужеви вложи Бог в сердце любити мя худаго и тои указа ми добре вся святаа та места, и в Иерусалиме и по всей земли той поводи мя и до Тивириадскаго моря поводи мя, и до Фаворы, и до Назарефа, и до Хеврона, и до Иордана, и по всем тем местом поводи мя, и потрудися со мною любве ради. И ина святаа места видех многа, яже последи скажу.

О пути в Иерусалим

А се есть путь к Иерусалиму. От Царя града по лукоморию идти 300 верст до Великаго моря, до Петалы острова 100 верст. То есть первый остров на узцем мори; и ту есть лимен добр и ту есть град Ираклия Великая; и противу тому граду святое миро выходит из глубины морскыа; ту святии мученицы погружени суть мнози от мучителев. От Петалы острова до Калиполя 100 верст, а от Калиполя до Авида града 80 верст. Противу тому граду лежит святый Еуфимие новый. А оттуде до Крита 20 верст и ту есть на Великое море внити, на шюе в Иерусалим, а на десно к Святой Горе, и к Селуню, и к Риму. А от Крита до Тенеда острова верст 30. То есть первый остров на Велицем мори и ту лежит святый Навгудимос мученик. И противу тому острову на брезе град велик был именем Троада, и ту есть Павел апостол приходил и научил ту страну всю и крестил. А от Тенеда острова до Метании остроава верст 100; и ту лежит святый мученик Исидор; и в том острове ражается мастика и вино доброе и овощь всякий.

О Ефесе граде

А от Ахия острова до Ефеса града верст 60. И ту есть гроб Иоанна Богословца и исходит персть святаа из гроба того на память его, и взимают вернии человеци персть ту святую на исцеление всякаго недуга; и свита Иоаннова ту лежит в ней же ходил.

И ту есть близь пещера идеже лежат телеса 7-ми отрок, иже спали 300 и 60 лет; при Декии цари усопша, а при Феодосии цари явишась. В той же пещере 300 святых отец лежит; и святый Александр лежит ту, и гроб Магдалыни Марьи и глава ея, и святой апостол Тимофей, ученик святаго апостола Павла, в ветсем гробе лежит. И ту есть ветсей церкви икона святыя Богородица, ею же святии препреша Нестория еретика. И ту есть баня Диоскоридова, идеже работал Иоанн Богослов с Прохором у Романы. И видехом пристанище то, идеже Иоанна Богословца море изверже; ту стояхом три дни; и зовется пристанище то Мореморное. Ефес же град есть на сусе, от моря вдале 4 версты, в горах, обилен же есть всем добром. И ту поклонимся святому гробу тому и, благодатию Божиею храними и молитвами святаго Иоанна Богословца идохом радующесь. А от Ефеса до Сама острова верст 40. И в том острове рыбы многы всякы и обилен есть всем островот. А от Сама до Кария острова верст 20.

О Патме острове

А от Кария до Патма острова верст 60. На стране далече в мори Патм остров. В том острове Иоанн Богословец Евангелие написал, егда заточен бысть с Прохором. Таже оттуда Лерос остров, таже Калимнос остроа, таже Нисера остров, таж и Кос остров, велик зело. Тот остров богат вельми всем, и людьми, и скотом. Таже Тилос остров: и в сем острове мука Иродова, кипит серою горящею; и ту серу варяче продают, мы же огонь вытинаем. Таже Харкия остров. И ти острови вси с людьми и скотом близ себе суть по ряду, яко по десяти верст или больши межи собою.

Таже Род остров, велик и богат всем вельми. И в том острове был Олег князь русскый 2 лет и 2 зиме. А от Сама до Рода острова 200 верст; а от Рода до Макрии 60 верст. И в том граде и по земли той по всей, нолны до Мир, ту ражается темьян черный и гонфит.

И тако ражается темьан черный и гофит: из древа исходит аки мезга и снимают железом острым. Имя древу тому зигия и есть яко олха образом древо то. А другое древце есть мало, образом яко осина, но есть имя древцю тому рака; и есть в древци том червь велик, яко поноров в боле есть, за корою древца того; и точит древце то червет и исходит из древца того червоточина та, яко отруби пшеничны и падают от древця того яко клей вышневый. И то собирают людие и смешивают с первореченным древом и, вложивши в котел, и тако варят темиан гонфит, и кидают в мехи, продают купцем. А от Макрии до Патера града верст 40 и ту есть рожество святаго Николы, то его есть и отчина и род – Петера. А от Петеры до Мир, идеже гроб святаго Николы, есть верст 40; а от Мир до Хилидония верст 60; а от Хилидония до Кипра великаго острова верст 200.

О Кипрьстем острове

Кипр есть остров велик зело, и множество в нем люди, и обилен есть всем добром. И суть в нем епископи 20, митрополия же едина, а святых в нем без числа лежит: и ту лежит святый Епифание, и апостол Варнава, и святый Зинон, и святый трифолие епископ, его же крестил апостол Павел.

О горе, идеже Святая Елена крест поставила

И ту есть гора высоко зело, и на той горе святаа Елена крест поставила, кипарисен велик на прогнание бесом и всякому недугу на исцеление; и вложила в крест честный гвоздь Христов. И бывают ту, на месте том у креста того, знамения велика и чюдеса и до ныне. Стоит же на воздусекрестот, ничим же не придержится к земли, но тако Духом Святым носим есть на воздусе. И ту недостойный аз поклонихся святыне той чюдной и видех очима своима грешныма благодать Божию на месте том и проходих остров той весь добре.

О Финияне

И ту ражаеться темиян ладан, спадает с небесе и тако взимают на древцих. Суть бо по горам тем древца многа и низка, с травою равна, и на том падаеть темианот добрый и емлють его Июля месяца и августа, в иныя же месяци не спадывает, но токмо в та два ражаеться. А Кипра до Яфа града верст 400 все по морю ити; от Царя града до Рода острова 8 сот верст, а от Рода до Афа 8 сот верст; то ти всего пути по морю до Афа есть верст 1000 и 600. Яф же есть град на брезе близ Иерусалима, и оттоли пойти по суху к Иерусалиму. И есть от Афа до Иерусалима верст 30, по полю 10 верст ити до святаго Георгия. Ту была церковь велика создана во имя святаго Георгия, ту бо и гроб его во алтари был ту же есть мученик святый Георгие и воды многи суть ту ; и ту опочивають странници у воды тоя, но со страхом великим: есть бо пусто место то, и близ есть Асколон град, выходять бо оттуду Срацини и избивають странныя на путех тех, да ту есть боязнь велика, от места того входя в горы. И есть от святаго Георгия до Иерусалима верст 20 великих, но все в горах каменных; и ти путь тяжек и страшен зело.

О горе Армаф(ем)

И ту есть гора высока, близ Иерусалима, на десной руце тамо идуще от Афа, имя горе той Армафем. На той горе той Армафем; на той горе есть гроб святаго пророка Самоиля и отца Елъкана и Марьи Египтяныни, ту бо святых было село и дом. И есть место то градом оделано, да тако зовется градот Армафем.

О Иерусалиме

Есть же святый град Иерусалим в дебрех, около его горы камены и высокы. Да нолны пришедше близько граду тоже видети первое столп Давидов и потом, дошедше мало, увидети Елеоньскую гору и Святаа Святых и Воскресение церковь, идеже есть Гроб Господень, и узрети потом весь град. И ту есть гора равна от пути близ града Иерусалима, яко версты вдале; на той горе сседают с конь вси людие и поставляють крестьци ту и покланяются святому Воскресению на дозоре граду. И бывает тогда радость велика всякому христианину, видевше святый град Иерусалим и ту слезам пролитье бывает от верных человек. Никто же бо может не прослезитися, узрев желанную ту землю и места святаа вида, идеже Христос Бог наш претерпе страсти нас ради грешных. И идут вси пеши с радостию великою к граду Иерусалиму. И ту есть на левой руце, у пути тамо идучи, церкви святаго Стефана Первомученика; на том месте побиен бысть камением Стефан Первомученик от Июдей, и ту есть гроб его. И ту есть гора камена плоска проселася в распятие Христово то зовется ад; есть близ стены градныя, яко довержет. И потом входят в святый град Иерусалим вси людие с радостию великою враты, сущими близ сына Давидова, и та суть врата от Вифлеома лиц, и ту суть врата Вениаминова. Яко войдуче в град путь есть сквозе град в Святая Святых на правую руку, а на левую к Святому Воскресению идеже есть Гроб Господень.

О церкви воскресения Господня

Есть церкви воскресения Господня всяка образом кругло создана, столпов имать 12 обьлых, а 6 зданых; мощена же есть досками мраморяными красно; двери же имать шестеры, а на полатех столпов имать 16. А над полатьми под верхом исписани суть пророци святии мусиею, яко живи стоят; а над олтарем написан есть Христос мусиею. В олтари же велицем написано есть Адамово воздвижение мусиею; горе верху написано есть мусиею Вознесение Господне оба полы олтаря на обою столпу написано есть Благовещение. Верх же церковный не до конца сведен каменем, но тако сперен есть древом тесаным, яко пол стичным образом; и тако есть без верха, ни покрыта ничем. Под тым самым верхом непокрытым гроб Господень. Есть же сице гроб Господень: яко печерка мала у камени сечена, дверци имущи малы, яко может человек влести на колену, поклонься, возвыше же есть мала, всямокачна, 4 лакоть и в длину и в ширину. И яко влезуче в пещерку ту дверцами малыми и на десней руце есть яко лавица засечена в том же камени пещерьнем и на той лавице лежа тело Господа Нашего Иисуса Христа. Есть ныне лавица та святая покрыта досками мраморяными. Суть на стране проделана оконца 3 кругла и теми оконци видиться святый то камень и туде целують вси христьяне. Висить же в гробе Господни 5 кандил великих с маслом и горят беспрестани кандила свята день и нощь. Лавица же та святаа, идеже лежало тело Христово, есть в длину 4 лакот, а в ширину 2 лакти, а возвыше полулакти. И пред дверми пещерными предлежит камень, треи стоп вдале от дверец тех пещерных; на том камени ангел седя явися женам и благовести има воскресение Христово. Есть пещерка та святаа оделана около красным мрамором яко имен и столпьци около мрамором красным стоят числом 12. Верху же над пещеркою сделан яко теремец красен на столпех, верху кругол и сребреными чешюями позлащенными покован; и на верх того теремца стоит Христос, сделан сребром яко в мужа более, и то суть фрязи сделали. И ныне есть под самым верхом тем непокрытым суть двери 3-и у теремца того учинени хитро, яко и решето крестьци. И теми дверми влазят людие к гробу Господню. Да то есть гроб Господень был пещерка та, яко же сказах испытах добре от сущих ту издавна и ведущих по истине вся та святаа места.

Есть же церковь та воскресение образом кругла, всямокачна и в дле и в преки имать же сажень 30. Суть же в ней полати пространьны и тамо горе живет патриарх. И есть же от дверей гробных до стены великаго олтаря сажень 12. Ту есть вне стены за олтарем пуп земли, и создана над ним коморка и горе написан Христос мусиею и глаголет грамота: «се пядию моею измерих небо и землю».

О месте среди земля, идеже распяться Христос

А от пупа земнаго до распятия Господня и до края есть сажень 12. Есть же распятие Господне к востоку лиц, есть же на камени высоко было яко стружия выше. Камень же тый был кругол яко горка мала. А посреди камени того, на самом верху, высечена есть скважня лакти во глубле а в шире мний пяди круг, и ту был водружен крест Господень. Исподи же под тем каменем лежит первозданнаго Адама глава; и в распятие Господне, егда на кресте Господь Наш Иисус Христос предаст Дух свой, и тогда раздрася церковная катапетазма и камение распадеся; тогда же и камень проседеся над главою Адамлею и тою расселиною сниде кровь и вода из ребр Владычень на главу Адамову и омы вся грехы рода человеча. И есть расселина та на камени том и до днешняго дне знати есть на десней стране распятия Господня знамение то честное.

О месте лобном

Есть распятие Господне и каменет святый оздан стеною все, горе над распятием создана комара, хитро исписана мусиею дивно; и от востока лиць на стене написано есть мусиею Христос на кресте распят, хитро и дивно прям яко жив, и вболе и возвыше, яко же был тогда; а полудне лиць написано есть снятие такоже дивно. Двери имать двои; взлести же есть горе по степенем; до дверей 7 степеней, а в двери вшед 7 степеней. Помощено же есть мраморными досками красными.

Споди же под распятием, идеже есть глава, тако же приздано есть яко церквица мала и красно исписана есть мусиею и помощена есть красным мрамором: да то зовется Крайниево место еже есть лобное место; а горе, идеже есть распятие, – то зоветь Голгофа. А от распятия Господня до снятия есть сажень 5. И ту есть у распятия Господня близ место к полунощию лиц, идеже разделиша ризы его, и ту другое место, иде же взложиша венец тернов на главу Господню и в багряницу поругания облекоша.

О жертвенице Аврамове

И ту есть близ жертвенник Авраамов, идеже положи жертву Богови Авраам и закла овен в Исаака место; на то же бо место възведен бысть Исаак, идеже Христос взъведен бысть на жертву и заклан бысть нас ради грешных. А оттоле есть близ место, яко двою сажень далее, идеже заушен бысть Христос Бог наш. А оттоле есть далее 10 сажень святая темница, идеже всажен бысть Христос и ту посидел мало, дондеже приспеють Июдеи и поставять крест, да распнуть и. И та святаа места вся, под одиным покровом, суть по ряду вся к полунощию лиц. А от темници Христовы до места, идеже святая Елена налезла честный крест, гвоздия, и венец, и копие, и губу, и трость, есть сажень 20 и 5. Есть же гроб Господень и распятие и та святаа места вся на удолнм месте суть; и есть вгорие от запад лиць над гробом и над распятием.

И ту есть место на пригории; на то место притече скоро святая Богородица, тщаше бо ся текущи вслед Христа и глаголаше в болезни сердца своего слезящи: «камо идеши, чадо мое; что ради течение се скорое твориши? Егда другий брак в Кана Галилеи, да тамо тщишися, Сыну и Боже мой? Не молча отъиди мене рожшаа тя, дажь ми слово рабе, своей. И пришедши на место то святаа Богородица и узре с горы тоя Сына своего распинаема на кресте и видевши ужасеся и согнуся и седе, печалию и рыданием одержима беаше. И зде сбысться пророчество Симеоне, яко прежь рече святей Богородици: «и се лежит на встание и на падение многим в Израили, и тебе же самой оружие душу пройдет, егда же узриши Сына своего закалаема». Туже стояху мнози на месте том, друзи и знамениа его, издалеча зряще: Мария Магдалыни и Mapия Иаковля и Саломии, идеже стояху вси, иже от Галилея пришедше и с Иоанном и с материю Иисусовою; стояху же вси знаемии друзи Иисусови, зряще издалеча, якожь пророк глаголеть о том: «друзи же мои и ближники моя из­далече мене сташа». И то место есть подаль от распятия Христова, яко полутораста сажень есть на запад лиць место то от распятия Христова; имя месту тому Спудий, иже ся протолкует тщание Богородично. И есть на месте том ныне манастырь, церкви святаа Богородица клетьски верх въсперен.

О столпе Давыдове

А оттуда есть до столпа Давыдова и до дому сажень, Столп же то есть святаго пророка Давида; ту есть и дом его был. В столпе Давыд пророк и псалтырю сставил и написал. Дивен есть столпот великим камением сделан высоко вельми, на 4 углы создан и весь есть черств и днероден, и камень уродился, посреде его воды в нем многи. Двери же имать 5-ры железны и степеней имать 200, по нима же взити горе, и жита в нем бесчисла желит. И есть много тверд ко взятию, и то есть глава всему граду тому; и блюдут его вельми и не дадять власти никому же вонь лапь. Мне же худому недостойному пригоди Бог в столпот святый, одва могох ввести с собою единаго Издеслава.

О дому Уриеве

А от столпа того близ был дом Уриев, его ж Урию уби Давыд и поя жену его, видев ю мыющюся в бани. И ту есть нове метохия святаго Савы, и есть же близ от столпа, яко можеть доверечи. Есть знати где же была баня та до днесь; есть же, идеже святая Елена крест честный налезла, близ распятиа Господня к востоку лиць сажень 20 вдалее. И ту есть была на месте том церкви создана клетски велика велми, ныне же мала церквица. Ту суть двери великия к востоку лиць, к тем дверем прииде святаа Мария Египтянына и xoте влести и целовати хоте, и не впусти ея сила Святаго Духа в церковь. И потом помолися святой Богородице: то бо стоаше икона святая Богородица в притворе том, близ дверии тех, и потом возможе ити в церковь и целовати честный крест. Теми ж пакы дверми изыдох в пустыну Иорданскую. А от тех дверей близ место, идеже искуси святаа Елена крест Господень честный, aбиe вста мертваа девица. А оттуду есть поидучи мало ко востоку лиць притории, идеже воини приведоша Христа к Пилату, и ту руце свои умыв Пилат и рече: «чист есть от крове сего праведника». И бив Иисуса и предасть Июдеом. Тут же есть темница июдейска; ис тоя темници изведе Ангел святаго Апостола Петра в нощи. И то есть был двор Июдин, предателя Христова. Есть пусто и ныне дворище то проклятое, никто же не смеет на месте том сести клятвы ради. А оттуда ма поидучи ко встоку лиць есть место, идеже Христос кровоточивую исцели. И ту есть ров близь, идеже ввержен бысть Еремиа пророк; ту и дом его был, тужь и Павла Апостола двор был прежь, егда бяше в жидовстве. А оттуды мало поидучи ко востоку лиць уступить мало с того пути, ту есть дом был святаго Иоакима и Анны. Ту есть печера мало исподи поди под олтарем в камени; в той печере родилася святая Богородица, в той же печере есть гроб святаго Акима и Анны.

Овчии купели

А оттуду есть близ притор Соломонь, идеже есть овча купель, идеже Христос разслабленнаго испели, и есть место то к западу лиць о Акима и Анны, близ яко довержет человек. Оттуду на восток лиць близ суть ворота городнаа, теми вороты исходят к Гепсимании.

О церкви Святая Святых

А от Воскресения Христова Святаа Святых есть вдалее, яко дважди дострелити может. Есть церкви Святая Святых дивно и хитро создана моисиею издну и красота ея несказанна есть, кругла образом создана; извну написана хитро и несказанна, стены ей избьены досками мраморными другаго мрамора и помощена есть красно мраморными досками. Столпов же имать под верхом, кругом стоящих, облых 12, а зданых столпов 8, двери же имать 4-рь; медию позлащеною покованы суть двери ты. И верх исписан издну мусиею хитро и несказанно, а звну, верх побиен есть был медию позлащеною. Под верхом же тем самем есть пещера, в камене изсечена, и в той пещере убиен есть Захария пророк; ту же и гроб его был и кровь его ту же есть была, ныне же несть ту. И есть ту камень вне пещеры тоя под верхом же, и на том камени Иаков сон видел: и се лествиця бяше до небеси и Ангели Божии восхожаху и низъхожаху по ней; и ту брался с ангелом Иаков и, вста от сна, Иаков и рече: «се место дом Божий и се врата небеснаа суть». И на том же камени пророк Давид виде ангела, стояща с оружием нагим и секуща люди Израилевы, и влез в ту пещеру плакаше, моляся Богу и рече: «Господи, не овца согрешиша, но аз согреших». Есть же церкви та всямокачна, сажень 30 и впреки и вдле, всходы же 4-ри. Ветхая же церкви Святаа Святых рена есть и несть ничтожь от перваго здания Соломоня знати и токмо знати насоп церковный, еже Давид пророк начал здати; и пещера та дне в церкви и каменет, иже то есть под верхом, то есть ветхаго здания толко, a сиа церкви нынешняя создана есть от старейшины срациньскаго, именем Амор.

О дому Соломоне

Ту же был дом Соломонь и сильно было здание его, и велико вельми, и зело красно. Мощен был весь мраморными досками и есть на комарах утвержен, и воды исполнен весь домот был. Храми же создани были красни зело и хитро мусиею украшено изрядно, и столпи мраморяни драгаго мрамора и красно поставлени стоят по ряду; и комары на столпех тех создани суть хитро, и покрыт оловом весь. И ту суть врата дому того, красно зело и хитро покрыта оловом, мусиею исписана и покована медию позлащеною, и та врата зовутся Красная, идеже Петр и Иоанн ицелиста хромца онаго; и есть место то у врат тех и до ныне. А иныя врата суть троя кроме тех, а 5-я врата суть апостольская. Та бо врата Давид пророк создал есть твердо и дивно хитростию врата суть сделана, медию позла­щеною покована была, издну исписана хитро была по меди, а извну железы покована была твердо и суть 4-ры двери у врат тех, и та бо суть врата осталася толко ветхаго здания, тии столп Давидов, а ино здание все ново есть. Ветхий бо град Иepyсалим разорен есть весь не единою. И теми враты вшел есть Христос в Иерусалим от Вифаниа с Лазарем, егда воскресила Лазаря Христос. Вифаниа на восток лиць противу Елеоньстей горе. И есть от тех врат до церкви Святаа Святых сажень 100 и 8.

О веси Вифание

Вифаниа же от града Иерусалима вдалее двою версту, за горою во удолне месте; и есть Вифаниа градок мал к полуденью лиць от Иерусалима. И влезучи есть во врата городка того, на десней руце есть пещера и в той пещере есть гроб святого Лазаря; и в той келии Лазарь болел, туже и умер был. И есть посреде градка того церкви велика, создана вверх и исписана добре была вся. И есть от церкви тоя до гроба Лазарева сажень 12; и есть гроб Лазарев от церкви к западу лиць, а церковь к востоку лиць. И пред градом к западу лиць есть вода добра зело, и есть глубоко в земли, по степенем влести к ней. А оттуда есть к Иерусалиму лиць столп от Вифания вдале версты; и на том месте усрела Марфа Иисуса; ту паки на осля всел Христос, егда Лазаря въскресив.

О веси Гепсимание

Гепсиманиа же есть село идеже есть гроб святыя Богородица близ града Иерусалима на потоце Кидарьстем в удоле плачевнем, и есть от Иерусалима межи востока лиць летним и зимным.

О вратех градных

И есть от врат градных сажень 8 до места идеже Охония жидовин хоте съврещи тело со одра Святыя Богородица, егда несяхуть е погребат апостоли в Гепсиманию, и утя ему ангел обе руце мечем и положи я на нем. И есть на месте том был монастырь женъскый и ныне же разорено есть от поганых.

О месте гроба Святыа Богородица

И оттуда до гроба Святыя Богородица есть сажень 100. И есть гроб Святыя Богородица в удолне месте пещерка была мала в камени изсечена, дверци имущи малы, яко может человек влести наклонься; и во дне в пещере той противу дверцам, яко лавица засечена, в том же камени пещернем, и на той лавици положено бысть тело честное Пречистыя Владычица Нашеа Богородица и оттуда же взято бысть в рай нетленно суще. И есть пещерка та дне мужа возвыше, а в шире 4 лакот, всямокачна, а около теремцем оделана красно мраморными досками, а верху, над гробом Святыя Богородица, создана была церкви велика вельми клетски, во имя Святыя Богородица Успения; ныне же разорено есть от поганых место то. И есть гроб Святыя Богородица исподи под великим олтарем тоа церкви.

О пещере, идеже предан бысть Христос

А от гроба Святыя Богородица есть сажень 10 до пещеры, идеже предан бысть от Июды жидом на 30 сребреницех. И есть пещера та обон пол потока Кедарьскаго при горе Елеоньстей.

И ту есть место близ пещеры тоя, яко довержет человек каменем малым, и есть к полуденью лиць место то, идеже помолися Христос Отцу Своему в нощи, в нюже предан бысть на распятие Июдеем и рече: «Отче, аще возможно есть, да минет чаша си от Мене». И есть на месте том ныне создана церквица мала. А оттуда есть дострела вдалее до гроба Асафатова; и то есть был царь Июдейский и потому зовется та дебрь Асафатова. И ту есть близ в той же дерби гроб святаго Иякова, брата Господня.

Елеонскаа же гора есть от Иерусалима на летний восток лиць. От Гепсимании полести есть на гору Елеоньскую высоко вельми, яко может на ню 3-жды встрелити едва, но до Отче Наш только может встрелити от Гепсимании.

О пещере, идеже нача Христос ученикы своя учити

И ту есть создана церкви велика и пещера подо олтарем есть исподи; в той пещере Христос научи ученики своя пети “Отче наш” А оттуда верха самого Елеонскыя горы, идеже есть вознесение Господне, есть сажень 90.

О горе Елеонстей

Вознесение же Господне есть на верх Елеоньския горы прямо к стоку и есть яко горка мала, и на той горце был камень кругл выше коле; с того камени вознесълся Христос Бог наш на небеса; и есть место то оздано все комарами около, и верх на комарах тех создана есть, яко двор камень кругом и помощен есть весь дворот мраморными досками. И посреди того двора есть создан аки теремец кругло, и есть без верха, тако и во дне теремца; и в том теремци, под самым верхом тем непокрытым, лежит каменет святый, идеже стоясте и нозе пречистеи Владыки Нашего и Господа. И есть под каменем тем трапеза сделана досками мраморными, и на той трапезе литургисають ныне. Есть исподи под свято трапезою каменет, оделан весь около досками мраморными, толико верх его видети мало, и ту целують вси християне. Двери же имать 2 – и теремецет, възлести же есть по степенем ко вознесению Господню, и есть же степеней тех 22. И есть гора Елеоньскаа высока над градом Иерусалимом и видети с неа все в граде Иерусалиме, и Святаа Святых, и до Содомскаго моря и до Иордана с нея дозрети, и всю ту землю, и обон пол Иордана все с неа видети: вышьши бо есть всех Еленьскаа гора сущих гор около Иерусалима.

О граде Иерусалиме

Иерусалим же град есть велик и твердь стенами вся мокачен на 4 углы крестьным образом создан есть; дебри суть многи около его и горы каменыя. Безводно место то есть; ни реки, ни кладязя, ни источника несть близ Иерусалима, но токмо едина купель Силоамля; но дождевою водою живуть вси людие и скоти в граде том. И жита добра ражаються около Иерусалима в камении том без дожда, но тако Божиим повелением и благоволением родиться пшеница и ячмень изрядно: едину бо кадь всеяв и взяти 90 кадей, а другоици 100 кадей по единой кади; то несть ли то благословение Божие на земли той святой. Суть винограда мнози около Иерусалима и овощнаа древеса многоплодовита; смокви и агодичия, и масличие, и рожци, и ина вся различнаа древеса без числа по всей земли той суть. И на той же горе Елеоньской есть пещера глубока, близь вознесения Господня на полудне лиць, и в той пещере и гроб святыя Пелагии блудници; и ту есть столпник близь, муж духовен вельми.

О пути к Ердану

И есть путь от Иерусалима к Иордану чресь Елеоньскую гору на летний восток лиць, и есть путет тяжек велми и страшен и безводен: суть бо горы высокы камены, и суть разбои мнози, и разбивають в горах тех и в дебрех страшных. И есть от Иерусалима до Иордана 26 верст великих, 15 верст до Кузивы, идеже постился Иоаким неплодства ради своего; и есть место то в потоце глубоко у пути близ на левой руце тамо идуче. А от Кюзивы до Иерихона 5 верст, а от Иерихона до Иордана 6 верст великых, все по равну в песце, путь тяжек вельми; ту мнози человеци задыхаються от зноя и ищезають от жажи водныя умирають; ту бо море Седомское близ от пути того, исходит дух зноен смердящь, зноит и попаляеть всю землю ту. И ту есть, недошедше Иордана, близ на пути, монастырь святаго Предтечи и есть горе возделан.

О горе Ермоньстей

И ту есть гора Ермон близ монастыря того вдале яко 20 сажень; и есть на левой руце тамо идучи у пути близь; и есть песочна горка та не велика, но мала.

А от Ермона до ветхаго монастыря Иоаннова вдалее дващи дострелити гораздо и ту есть была церкви велика создана во имя Предтечи Иоанна.

О месте идеже море виде побеже и Ердан возратися вспять

А за олтарем тоя церкви близь востоку лиць на пригории есть создан яко олтарець и комара мала, и на том месте есть крестил Предтеча Иоанн Господа нашего Иисуса Христа; до того бо места изиде Иордан от ложа своего возвратився, видев Творца своего, пришедша крестится, и убоявся возъвратися вспять и прииде до того места. И ту есть море Содомьское близь купили тоя было, ныне же есть дале от крещениа, яко 4 версты вдалее отбегло; тогда убо узрев море наго Божество, стоаще в водах Иорданьскых, и убоявся, и побеже, Иордан возвратися вспять, якоже пророк глаголеть о том: «что ти есть, море, да побеже, и ты, Иордане, возвратися вспять?».

О месте, идеже крестися Христос

От того, идеже ся крестил есть Христос, есть до самыя реки Иордановы вдале, яко может доверечи мужь каменемь малым.

О купели

И ту есть купель на Иордане, и ту ся куплють христиане приходяще; ту же есть брод чрез Иордан во Аравию; на том же месте Иордан раступися древле сыном Израилевым, и проидоша людие посуху; ту же и Елесей удари милотию Илииною в воду и проидоша Иордан по суху; на той же купели и Мария Египтяныни преиде по водам к отцю Зосиме и прият тело Христово и пакы по водам же преиде в пустыню.

О Ердане

Иордань же река течетъбыстро, бреги же имать обон пол прикруть, а отсуду пологы; вода же мутна велми и сладка пити и несть сыти пиюще воду ту святую; ни с нея болеть, ни пакости во чреве человеку. Всем же есть подобен Иордан к реце Сновьстей, и вшире, и в глубле, и лукаво течет и быстро велми, яко же Сновь река. Вглубле же есть 4 сажень среди самое купели, яко же измерих и искусих сам собою, ибо пребродих на ону страну Иордана, много походихом по брегу его; вшире же есть Иордан яко же есть Сновь на устии. Есть же по сей стране Иордана на купили той, яко леси древо не высоко, аки вербе подобно есть, и выше купили тоя по брегу Иорданову стоит яко лозие много, но несть якоже наша лоза, но некако аки силяжи подобно есть; есть же и тростие много; болоте имать яко Сновь река. Зверь мног ту и свинии дикии бещисла много, и пардуси мнози ту суть львове же.

Обон пол Иордана горы высокы каменыя и суть подаль от Иордана; а под теми горами другыя горы близь суть белы, и ты суть близь Иордана; и то есть земля Заулоня и Нефеалимьля обон пол Иордана.

О пещере Иоанна Крестителя

И ту есть близь место к востоку лиць, яко двою дострелу вдалее от реки, идеже Илиа пророк въсхищен бысть на колесници огньней. Ту же и пещера святаго Иоанна Крестителя. И ту есть поток, воды исполнен, и течет красно по камению во Иордан; и вода та студена зело и сладка вельми, и ту воду пил Иоанна Предтечя Христов, егда жил в пеще той святой.

О пещере Ильи пророка

И ту же есть другая пещера дивна, идеже жил святый Илия пророк с Елисеем, учеловеком его. И то все благодетию Божиею видехом очима своима грешныма и недостойныма. И сподоби мя Бог трижды быти на святемь Иордане, и в самы водокрещный праздник быхом на Иордане, видехом благодать Божию, приходящюю на воды Иорданьскыя, и множьство народа бесчисла тогда пришедших к воде; всю нощь ту пение бывает изрядно и свещь бесчисла горящих и в полунощи бывает крещение воде; тогда бо и Дух Святый приходит на воды Иорданскиа и видять достойнии человеци дoбpии, а вси народи не видят ничтоже, но токмо радость и веселие бываеть тогда в сердци всякому християнину, и егда рекуть: «во Иордане крещьшутися Господи», тогда вси людие в воду и крестяться в полунощи в Иерданьстей реце, яко же и Христос в полунощи крестился есть. И ту есть гора, высока зело, обон пол Иордана; видети ю есть отвсюду издалеча, и на той горе пророк Моисей преставился есть, видев землю обетованную. А от монастыря святаго Иоанна до Гарасимова монастыря есть верста едина, а от Гарасимова монастыря до Каламонии, до монастыря святыя Богородица, есть верста едина.

И на том месте святыя Богородица с Иисусом Христом, и с Иосифом, и с Ияковом, егда бежаху в Египет, то на том месте нощлег створиша; тогда святаа Богородица нарече имя месту тому Каламонии, еже ся протолкует «Доброе обителище». Ту ныне сходит Дух святый ко иконе святыя Богородица. И есть монастырет на устьи, идеже входит Иордан в море Содомское, и есть градом оделан весь около монастырет; черноризец же в нем 20. А оттуда до манастыря Иоанна Златоустаго верст две, а тый манастырь такоже градом оделан весь и есть богат вельми.

О граде Иерихоне

А оттуда до Иерихона есть верста едина. Иерихон же тый был первее град велик итверд велми, того Иерихона Иисус Навгин взял и разорил до конца; ныне же ту есть село Срациньское. И ту есть дом Затхеев и пень древа того и до ныне стоит, нань же бяше възлезл, хотя видети Христоса. Ту же есть был и дом оноя Сумантяныни, идеже и Елесей отрочища воскресил. Есть же около Иерихона земля добра и многоплодна, и поле красно и равно, и около его финици мнози стоять высоци и всякаа древеса многоплодовита суть; и воды многы текут, разведены по всей земли той, ти суть воды Иелисеевы, их же ослади Иелисей пророк.

И ту есть место близь Иерихона, верста едина вдалее на летний восток лиць, и на том месте явися святый Михаил архистратиг Иисусу Навгину пред полком Израилевым, и возвед очи свои Иисус виде пред собою мужа страшна вооружена, и рече Иисус: «наш ли еси, или от супостат наших?» И рече ему архистратиг: «аз есмь Михаил, воевода Божий, послан есмь на помощь тебе; дерзай и побежай супостаты твоя. И рече ему: изуй сапог от ногу твоею; место бо, на нем же стоиши, свято есть. И паде Иисус на лици своем и поклонися. И есть на месте том ныне манастырь и церкви, создана во имя святаго Михаила. В церкви той лежита 12 камени, и то камение тогда есть взято на дне Иорданове, егда раступися Иордан людем Израилевым; и взяша камение то иереи, носящей кивот завета Господня, по числу колен сынов Израилев, на память роду их. Имя месту тому Галганий, на том бо месте сташа сынове Израилевы, прешедше Иордан.

О горе Гаваонстей

И от того места есть гора высока и велика вельми к западу лиць, имя горе той Гаваон; и над тою горою Гаваонъскою солнце ста и пожда, яко полудне, дондеже Иисус Навгин победи враги своя, егда биашеся с ним Ог, царь Васанеск и вся царьствия Хананейска. И победи Иисус до конца и тогда солнце зайде.

О пещере, идеже Христос постися 40 дни

В той же горе Гаваонъстей есть пещера высока зело, и в той пещере постился есть Xристос, Бог наш, 40 дний, последи же взалка; и ту прииде диявол, искусити хотя и рече ему: «аще еси Сын Божий, рци да камение се хлеби буду». Ту есть близ был дом Елисея пророка и пещера его, и кладязь есть к востоку лиць от Гаваона, а вдалее яко полверсты. И есть от Иерусалима верст 6 до Федосиева манастыря. Манастырет на горе градом оделан был и видети от Иерусалима. И ту есть пещера велика посреди манастыря, и в той пещере волсви нощьлег сотвориша, егда уклонишася от Ирода. И ту ныне лежить святый Феодосие и мнози святии отцы ту лежать; в той пещере лежит мати святаго Савы и Феодосиева мати ту лежит.

О лавре Святаго Савы

И от того манастыря до лавры святаго Савы емть верст 6. Манастыря же та оба на полуденье лиць; лавра же святаго Савы есть на дебри Асафатове, в удоли Плачевней, яже дебрь от Иepycaлима пойдет; от Гепсимании бо дебрь пойдет сквозе лавру и приходит к Содомьскому морю. Лавра же святаго Савы есть уставлена от Бога дивно и несказанно: поток бе некако страшен и глубок зело и безводен, стены имя бе высоки, и на тех стенах лпять келии прилеплены и утверждены от Бога некако дивно и страшно; на высоте бо той стоят келии по обема странама потока того страшнаго и лпят на скалах, яко звъзды на небеси утвержены. Суть же 3 церкви; посреди же келей тех к западу лиць, ту пещера дивна под скалою каменою, и в той пещере церкви Святыя Богородица, и ту пещеру показа Бог святому Саве столпом огненным преже живущу ему единому в в потоце том. И есть же первая келиа святаго Савы, идеже жил един, подаль от лавры нынешняя, яко полверсты вдалее; и оттуда показа ему Бог столпом огненным над местом темь святым, идеже есть ныне лавра святаго Савы; и есть дивно место и несказанно отнудь. И ту есть гроб святаго Савы посредие церквий тех трий, вдалее от великия сажень 4; и есть теремець над гробом святаго Савы, учинено красно. Ту же лежат мнози святии отци, телесы яко живи: святый Иоанн епископ, и Сихаст ту лежить; святый Иоанн Дамаскин ту лежить и святый Феодор Едесский ту лежить, и Михаил сыновець его; Афродитиан святый ту лежит, и инии мнози святии ту лежат, телесы яко живи, и благоухание от них исходит несказанно. И видех кладязь святаго Савы, его же показа ему в нощи осля дикое в потоце том, противу келии его; пихом от кладязя того воду сладку и студену зело. В месте бо том нигдеже несть реки, ни потока, ни кладязя, но токмо един кладязь святаго Савы есть бо место то безводно в горах каменных и есть пустыни та вся суха и безводна, но токмо дождевою водою живи суть сущии отцы в пустыни той. И ту есть близь лавры место на полудне лиць от лавры, имя месту тому Рува, и есть близь моря Содомьскаго. И суть горы высоки каменыя и пещеры многы ту суть в горах тех; и ту суть жили святии отцы в горах тех, в пустыни той страшней безводней. И ту суть жилища пардусом и осли дивии мнози суть. Море же Содомьское мертво есть, не имать в себе никакоже животна, ни рыбы, ни рака, ни сколии; но обаче внесеть быстрость Иорданьская рыбу в море то, то не можеть жива быти ни мала часа, но вскоре умираеть; изходит бо из дна моря того смола чермная верху выды тоя и лежит по брегу тому смола та много; и смрад исходит из моря того яко от серы горяща; ту бо есть мука под морем тем.

О манастыре святаго Евфимья

У лавры святаго Савы на восток лиць за горою манастырь святаго Еуфимья, 3 версты вдалее от лавры; и ту лежит святый Еуфимие и ини мнози святии отци ту лежат, талесы яко живи. И есть же монастырет на удолне месте и горы суть около его каменыя подаль; манастырь же был градом оделан и церкви же была добра вверх. И ту есть близь был манастырь святаго Феоктиста под горою на полудни лиць от манастыря Еуфимиева; и то все ныне разорено от поганных.

О горе Сионьстей

Сион же гора есть велика и высока есть, от юга лиць, а от Иерусалима полога и равна. И на той горе Сионьстей первое был град Иерусалим ветхий и того града ветхаго разорил Навходносор, царь Вавилонеск, при Еремеи пророце; а ныне Сион гора вне стены градныя есть, на юг лиць от Иерусалима Сион. И ту есть был дом Иоанна Богословца на горе Сионьстей, и на том месте создана была церкви велика клетьски; и есть от стены градныя яко довержет мужь каменемь малым до церкви святаго Сиона.

И в той церкви Сионьстей ту есть храмина, за олтарем тоа церкви, и в той храмине Христос умы ногы учеником своим.

О дому Иоанна Богослова, идеже Христос вечерял

И с тое храмины, на юг лиць поидучи, възлести есть по степенем яко на горницю; ту есть храмина создана красно, яко на столпии и с верхом, исписа муисиею и помощена красно и олтарь имать яко церкви на восток лиць, и то есть келиа была Иоанна Богословца, и в той келии Христос вечерял со ученики своими; ту же Иоанн возлежа на перси его и рече: «Господи кто есть предаяй тя?» На том же месте Сошествие Святаго Духа бысть на апостолы в Пентикостию.

В той же церкви есть другая храмина, доле на земли и низка есть храмина та, на юг лиць; и в ту храмину прииде Христос И ко учеником своим, дверем затвореным, и ста посреде их, и рече: «мир вам»; ту же и Фому уверил есть в 8-й день. Ту же есть святый камень, принесен ангелом с Синайскиа горы.

А на друзей стране тоа же церкве, к западу лиць есть другая храмина на земли низка, тем же образом, и ту в той храмине преставилася Святаа Богородица. И то все ся деяло в дому Иоанна Богословца.

И ту есть был дом Каиафин. И ту ся Петр отвергл Христа трижды, дондеже кур возгласит. И есть место на восток лиць от Сиона.

Идеже Петр отвержеся Христа трижды плакася горко. И оттуда есть близ паки место на стране горы, к востоку лиць, и ту есть пещера глубока вельми, слести в ню степеней 30 и 2; и в той пещере плакася Петр горко отвержениа своего; и над тою пещерою церковь есть создана во имя святого апостола Петра.

О купели Силоамстей

А оттуда, на полудне лиць, дол под горою, есть купель Силоамля, идеже Христос слепцю очи отверзе.

О селе Скудельничи

И ту есть под тою же горою Сионьское село Скудельниче, еже его купиша ценою Христово на погребание странным; и есть обон пол дебри под горою Сионьскою, на юг лиць от Сиона. И суть пещеры многи на стране горы у камени изъсечены и в тех пещерах дне суть гроби устроени, у камени изсечены дивно и чюдно; ту ся погребають страньни пришельци туне так; ничто же не дают от места того святаго: искуплено бо есть кровиюо Христовою.

О Вифлеоме

Вифлеем же святый и есть на юг лиць от Иерусалима святаго, 6 верст вдале, по полю 2 версте до сседаниа Авраамля.

Идеже отрока своего остави с ослятем Авраам и поя сына своего Исаака на жертву, и заде ему дрова понести и огнь, и рече ему: «отче, се дрова и огнь, а кое овча?» И рече ему Авраам: «Бог покажет, чадо, нам овча». И идяше Исаак радуяся путем тем с Иepycaлиму лиць. На том же бо месте приведен бысть Исаак, идеже Христос распят бысть.

И оттуда есть верста едина вдалее до места, идеже святаа Богородица виде двои люди, едины смеющася, а другиа плачющася. И ту есть, была церкви создана, манастырь был святыя Богородица; ныне же разорено есть от поганых.

А оттуда до гроба Рахилина, матери Иосифовы, еста версте 2.

О вертепе идеже Христа роди святая Богородица

И оттуда верста едина есть до места, идеже ссела святая Богородица с осляти, егда понуди сущее в чреве еа, хотя изыти. И ту есть камень велик, и на том камени почивала святая Богородица, тогда сседши со осляти; и от того камени, вставши, шла есть пеша до вертепа святаго и ту родила есть Христа в том вертепе святая Богородица.

И ту есть бдиз Рождество Христово, от камени того яко может дострелити добр стрелець.

О церкви Рождества Христова

И есть ту над вертепом тем святым Рождества Христова создана есть церкви велика крестом и верх ея клетьски въсперен, покрыта же есть вся оловом церкви та Рождества Христова, исписана есть мусиею вся; столпов же имать 8 облых мраморяных; помощена же есть досками мрамора белаго; двери же имать трои; есть же вдалее 50 сажен до великаго олтаря, а вшире 20 сажень. Есть же вертеп и асли, идеже было Рождество Христово, под великим олтарем, яко пещера велика, создана красно, и степеней имать 7, куда же сласти есть к дверем святаго вертепа святаго; имать двери двои, в других дверии 7 же степеней. И есть, восточными дверми влезучи в вертеп, на левей руце есть место на земли доле и на том месте родился Христос Бог наш; и есть над местом тем возделана трапеза святая и ту на той трапсзе литургисають.

О яслех Христовых

И ту есть место к востоку лиць, а противу тому месту на праве руце ясли Христовы; к западу лиць под скалою каменою суть ясли Христовы святыа и в тех яслех положен бысть Христос Бог, в рубища повит нашего ради спасениа, все претерпе. Близь же себе еста места та и Рожество и ясли, яко три сажени вдалее межи има еста; в единой. пещере оба места та; исписана же есть пещера та мусиею и помещена же красно. Церкви же исподи дупляста есть вся; и мощи святых ту лежать. И пойдучи из церкви на правую руку влезучи, и есть пещера глубока под церковь лиць, и в той пещере лежали мощи святых младенець и оттуда взяты суть святии младенци в Царьград. Создан же есть градок высок около всея церкви тоя. И есть место то было Рождества Христова на горе, кроме людей, в пустыни; да то ся зоветь ныне Вифлеем, кде то есть ныне Рождество Христово и градокот, а ветхий Вифлеем кроме того места был напреди, не дошедше Рождества Христова; и ту есть столпник ныне, и камень святыя Богородица; то на той горе есть был первый Вифлеем. И та земля вся около Вифлеема зовется Ефрант, земля Июдина, и о том пророк глаголет: «и ты, Вифлееме, земле Июдова, ничим же менши еси в тысящах Июдовах, ис тебе бо изыдеть вожь, иже упасеть люди моя Израиля». И есть земля та около Вифлеема красна зело в горах, и древеса многоплодовита овощнаа стоат по пригорием тем красно: масличие, и смоквие, и рожцие много бесчисла, виногради мнози суть около Вифлеема и нивы по удолием многи суть.

И близь церкве Рождества Христова, вне стены градныя, к полудню лиць дострела вдале на горе есть велика пещера, в той пещере жила святая Богородица с Христосом и со Иосифом.

О дому Иесеове отца Давидова

И ту есть место на стране града к встоку лиць, от града вдалее, яко дострелить; имя месту тому Вифиль. И ту был дом Иесеев, отца Давидова, и вот дом прииде Самоил пророк и ту помаза Давида на царство во Израили, в Саула место.

О кладязе Давидове

Ту кладязь Давидов, его же пити древле Давыд вжадася.

В месте, идеже благовестиша ангели пастухом Рождество Христово. А отътуда есть место под горою на поли версты вдале от Рождества Христова, на восток лиць; на том месте святии ангели благовестиша пастухом Рождество Христово. И есть ту была пещера; над тою пещерою создана была церкви добра во имя святаго Иосифа, и ту был мастырь добр; ныне же разорено есть от поганых место то. И есть около места того поле красно вельми и нивы многоплодны, и масличья много, и то ся место зовется Агиапимина, еже протолкуется святаа паства; и ту есть село святаго Савы к Вифлеему лиць под горою.

О пещере и о дубе Мамрийсте

А от Вифлеема есть на юг лиць Хеврон, пещера Сугубаа и дуб Мамбрийский. И есть от Иepycaлима до Хеврона верст 28, и есть путь мимо Вифлеем к Хеврону, ити до Вифлеома 6 верст, от Вифлеема до реки Афамьскиа суть версты 3. В той реце Афамьстей пророк глаголет Давид в псалтыри: «Ты исуши реки Афамля, Твой есть день и Твоя есть нощь». И есть река та ныне суха под землею течет река та и явится у моря Содомьскаго, ту бо входить в море Содомьское. И ту есть обон пол реки тоя гора камена высока вельми, лес на горе той велик и част; и есть путь сквозе гору ту страшную, неудобь проходно есть; есть бо ту твердь велика и биють Срацины в горе той; иже кто в мале хощеть пройти, то не можеть пройти; мне же Бог добру дружину и многу зело и тако могохом прейти бес пакости место то страшное; ту бо приложить Асколонь град, да оттуду да выходять погании и мнози и биють на пути том зле В той же горе, в том же лесе, убиен бысть Авесалом, сын Давидов; туда бо бежаше от беды отца своего, и ту внесе его мска в чащю леса того и я главу его за власы и съя с мщате, и повисе на древе высоко, и ту устрелен бысть в сердце 3-ми стрелами, и тако умре на древе том.

А оттуда до клятвенаго кладязя Авраамова есть верст 10, а от кладязя того до дуба Мамъбрийскаго есть верст 6.

О том же

Есть же дубот святый у пути на близу, тамо идучи на правой руце, и стоит красен на горе высоце; и есть около корения его доле от Бога помощено мрамором белым, яко же помост церковный помощено есть около дуба того всего добраго; и есть посреде помоста того выросл дубот святый ис камени того дивен есть. На верху горы тоя около дуба того уродилося яко дворище, равно и чисто бес камения, и ту стоял шатер Авраамов близь дуба того к встоку лиць. И есть тубот не велми высок, кроковат вельми и част ветми, и мног плод на нем есть; ветьви же его близь земли приклонилися суть, яко мужь можеть, на земли стоя, досячи ветви его; втолще же есть двою сажень моих около его, а голомя възвыше до ветвей его полуторы сажени. Дивно же и чюдно есть толь много лет стоящу древу тому, на толь высоце горе, не вредися, ни испорохнети, но стоит утвержен от Бога, яко то перво насажен. И под тый дуб прииде Святаа Троица к патриарху Аврааму и ту обеда у него под тем дубом святым; и ту благослови Святаа Троица Авраама и Сарру, жену его, и вда има родити Исаака на старость; ту и воду показа Святаа Троица Авраамови, и есть кладязет и доднесь под горою тою у пути близь. И та земля вся около дуба того зовется Мамбрия; да потому зовется дубот Мамбриский. А от дуба того до Хеврона есть две верьсте.

О горе Хевроне

Хеврон же гора есть велика и град был на горе той велик и твердь велми, и здаша его суть ветхаа; силно множьство людей седело перво по горе той и ныне же есть пусто. На той бо горе Хевроньстей и первое сел внук Ноев, сын Хамов, Ханаон, по потопе пришед от столпотворения, и населил был землю ту всю около Хеврона; да тако земля та зоветься Хананея. И ту земля обеща Бог Аврааму, и еще ему сущу в Месопотамии и в Хараоне; ту бо есть был дом отца Авраамля. И рече Бог Авраамови: изиди от земля твоея, и от дому отца твоего, и иди в землю ханан ейскую, и тобе дам землю ту и семени твоему до века и аз буду с тобою. И ныне по истине есть земля та Богом обетованна и благословена есть от Бога всем добром: шпеницею, и вином, и маслом, и всяким овощом обилна есть зело, и скотом умножена есть; и овци бо и скоти дважди ражаются летом; и пчелами увязло ту есть в камении по горам тем красным; суть же и виногради мнози по пригорием тем, и древеса много овощнаа стоят бесчисла, масличие, смокви, и рожци, и яблони, и черешни, инородия и всякий овощь ту есть; и есть овощет лучи и болий всех овоий, сущих на земли под небесем несть такого овоща нигдеже. И воды добры суть в месте том и всем здрави и есть место то и красотою и всем добром неисказанна есть земля та около Феврона. И ту есть был дом Давидов на той горе Февроньстей; и ту бо есть был Давид 8 лет, егда бяше выгнал сын его Авесалом.

А от Феврона до Сугубыа пещеры Авраамовы близь яко пол версты ближе. Сугубаа пещера в каменей горе есть и в той пещере есть гроб Авраамов, Исааков и Иаковль. Ту бо пещеру Сугубую Авраам купил у Ефронь Хетфеянина на погребетние всему роду своему, егда прииде от Месопотамиа въземлю Хананейскую, и ино не притяжа ничтоже первее, но токмо пещеру Сугубую на погребение себе и всему роду своему. И есть ныне создан градок мал около пещеры тоя, но тверд зело; и есть градок создан есть великим каменем, чюдно и несказанно хитростно, и стены его высокы суть велми; посреде градка того дне утвержена есть пещера твердо и помощен есть градок т весь дсками мраморными, белаго мрамора. И есть пещера та под мостом исподи утвержена вельми, идеже лежит Авраам, Исаак, Иаков и вси сынове Ияковли, и жены их ту лежат, Сарра, Ревека, а Рахиль кром лежить на пути у Вифлеема. Суть же в градце том дне над пещерею создани гроби разно себе; над гробы теми созданы церковци малы круглы; и есть близь себе гроб Авраамов и жены его Саррин, и гроб Исааков и жены его Ревекин близь себе, гроб Ияковль и жены его Илиин близь себе еста.

О гробе Иосифове

Иосифа прекраснаго гроб вне градка того, кроме пещеры Сугубыя вдалее, яко довержеть до градка того; и то место нын святый Авраам. И ту есть близь гора высока, на полудне лиць, от Сугубыя пещеры вдалее верста едина; и на ту гору взиде Святаа Троица со Авраамом; до тоя бо горы проводи Авраам Святую Троицю от дуба Мамбрийскаго. И ту есть место на верху горы тоя, красно и высоко зело, и на том месте Авраам, пад на лици своем, поклонися Святей Троици, моляшеся и глаголаше.

О молитве Авраамле

«Господи! Да не погубиши праведнаго с нечестивыми в пагубу! Но аще, Господи, обрящеши 50 праведник в Содоме; не помилуеши ли, Господи, всего града того 50 ради праведник?» И рече Господь Авраамови: «аще обрящу в Содомлянех 50 праведник, не погублю всего града того, 50 деля праведник». И паки поклонився Авраам Богови и рече: «аще обрящется в Содомех 30 праведник, не помилуеши ли всего града того?» И рече Господь Бог Аврааму: «аще обрящется 30 праведник в Содомех, не погублю всего града того». И поклонився Авраам Господеви и рече: «многомилостиве и терпеливе о беззакониих наших, Господи! Да не прогневаешися на мя, раба Твоего, п взглаголю еще единою: аще обрящется в Содомех 15 праведник, не помилуеши ли, Господи, всего града того, 15 ради праведник?» И рече Господь Бог к Авраамови: «аще обрящется в Содомех 15 праведник, не погублю всего града того, 15 деля праведник, ни 5 ради праведник, не погублю всего града того». И умолче Авраам и не приложи к тому глаголати ничтоже. С тоя же горы посла Святаа Троица два ангела в Содом, да изведуть Лота сыновьца Авраамова. Ту, на том месте, тогда Авраам жертву принесе Богови, пшиницею всыпав на огнь, и тем зоветься место то Жертва Авраамова. И есть место то высоко вельми, и видети есть оттуда всю ту Хананейскую.

И от жертвы Авраамовы до дебри Грезновы верста едина, а от дебри Грезновыя до гумна Анататова верста 1.

О гробе Лотове, иже в Сигоре

А оттуда до Сигора есть две версте. И ту есть гроб Лотов и обою дщерю его, 2 гроба еста. И в той же горе пещера велика, и в ту пещеру въбегл Лот со дщерма своима. Ту есть градищо близь первых людий, и был на горе той высок и то зоветься Сирог.

А оттуда есть веръсты вдалее место на взгории, к полуднию лиць от Сигора, и ту стоит жена Лотова столпом каменым. А от жены Лотовы до Содома есть две версте. И то все видехом очима своима, а ногама своима не могохом дойти до Содомскаго места, боязни ради поганых; и не даша ны ити тамо правовернии человеци, рекоша ны тако: «ничтоже вы тамо видети добра, но токмо муку, и смрад исходить оттуду, и болети ти будет; реша ны: «от смрада того злаго». Да ту ся възвратихом опять к святому Аврааму и, благодатию Божиею съблюдаеми, проидохом по здраву в Сугубую пещеру, в градок, и ту поклонихся святым местом всем и почихом ту два дни. Благодатию Божиею обретохом добру дружину многу, идущу в Иерусалим; и ту пристахом мы к ним и идохом с радостию с ними, безь боязни, и доидохом по здраву святаго града Иерусалима и похвалихом Бога, сподобившаго нас, недостойных, видети святаа та места, и неизреченнаа, и несказаннаа.

И есть на полудне лиць от Вифлеема манастырь святого Харитона, на той же реце Афамьстей, и есть близь моря Содомскаго, в горах каменых; и пустыни около его. Гроздно и безводно есть место то, и сухо; есть под ним дебрь камена и страшна зело; около был весь градом оделан, посреде же града того есть 2 церкви, в велицей есть церкви гроб святаго Харитона. Вне же есть града усыпалница, создана гораздо, и в той усыпальници лежат святии отци, телесы яко живи, и лежит их ту боле 7-сот; ту лежит святый Кирияк Исповедник, телом весь цел; ту лежита Ксенефонтова сына, Иоанн и Аркадие, и благоюхание чюдно от них исходит. И ту поклонихомся на месте том святом и взидохом я на гору на угь лиць, от манастыря того верста едина вдалее.

И ту место есть равно на ниве, и на том месте всхищен бысть пророк Аввакум, идущу ему на поле к женцем с брашном и с водою, и несе его Ангел в Вавилон к Данилови пророку в ров, и ту накормив Данила и напоив, и паки всхищен бысть Ангелом, в то же час, в том же дни, паки опять бысть на том же месте у жнець и дасть им обед. И ныне есть на месте том аки теремець создан, знамениа ради. Есть же Вавилон оттуду вдале 40 дний.

И от того места близь церква велика, клетьски создана, во имя святых пророк. И ту есть исподи под церковию тою пещера велика, и в той пещере лежита 12 пророка в трех раках: Аввакум, Наум, Михей, Иезекий, Авдий, Захария, Иезекия, Измаил, Савеиль, Варух, Амос и Осий.

И ту есть близь на горе село велико вельми, и седят в нем Срацини мнози, и Христиане суть же ту, в селе том, мнози. И то село есть святых пророк, ту ся суть родили святии пророци и то их есть отчина село то. И ту лежахом нощь едину в селе том, Божиею благодатию храними, и почестиша ны добре в селе том Християне. И ту, опочивше добре нощь ту, и заутра вставше рано, идохом к Вифлеему. Старейшина бо Срациньский сам со оружием проводи ны олне до Вифлеема и та места вся тоже ны проводил; а лапь не дойти до тех мест, поганых ради: туда бо ходять мнози Срацини и разбивають в горах тех. И доидохом по здраву до святого града Вифлеема и ту поклонихомся Рождеству Христову и, ту почивше, идохом с радостию в святый град Иepyсалим

Идеже уби Давид Голиафа

И есть ту место близь Иерусалима, на всток лиць от столпа Давидова, яко дострелить, и на том месте уби Давыд Голияда. И есть место подобно близь истерны, и ту есть ныне нива добра.

И оттуда дострела есть вдалее до пещеры, и в той пещере лежат мощи многих святых мученик, избиеных в Иерусалиме, во царство Ираклиево; и зовется место то Агаиа Мамила.

Идеже взрасте честное древо

И от того места до честнаго Креста есть верста едина; и есть место за горою, на запад лиць от Иерусалима, и на том месте посечен есть подножек Христов, на нем же пригвоздиша пречистеи нозе Господа нашего Иисуса Христа. И есть место то градом оделано, и посреде града того создана есть церкви, велика вверх, во имя честнаго Креста, исписана есть добре вся. И под великым олтарем, под трапезою глубоко, и есть пень древа того честнаго, и утверждено есть вельми, и покрыто есть над пнем тем дъсками мрамора белаго. И оконце проделано противу древу тому, и есть кругло. И то есть монастырь Иверьскый.

О дому Зарьине

И от того манастыря до дому Захариина суть версты 4, и есть место то под горою, к западу лиць от Иерусалима. В тот дом Захариин святая Богородица в подгорие к Иелисавефи и целова Иелисавефь; и бысть, яко услыша Иелисавефь целованье Марьино, взыгрался младенець радущами в утробе ея и рече Иелисавефь: «откуду се прииде ко мне мати Господа моего? Благословенна еси в женах и благословен плод утробы твоея. В том же дому Иоанн Предтеча родился есть. И есть ныне на месте том создана была церкви вверх; идуще в церковь ту, на левей руце, под малым олтарем, есть пещерка мала, и в той пещере родился Иоанн Предтеча. И есть место то было оделано гралом каменым все.

О горе, идеже бежа Елисавефь с Предтечею

А от туда есть полверсты черес дебрь горы, в нюже гору прибеже Иелисавефь и рече: «горо, приими матерь с чадом»! И абие разступися гора и прият ю. Слуги же Иродовы, иже гна в след ея, пришедше до места того, не обретоша ничтоже и возврвтишася томлены. И есть место то знати на камени том и до нынешняго дне. И есть над местом тем ныне создана церквица мала; исподи под церквицею тою пещерка мала и церквица другая, пред пещеркою тою приздана. Из тоя пещеры исходит вода добра зело и ту воду пила святаа Иелисавефь, с Иоанном, ту сущи в горе той; ту бо есть была умертвия Иродова, ангел бо ю надбяше в горе той. И есть гора та велика вельми и лес по ней есть мног, и около ея дебри суть многи, и есть на запад от Иерусалима; имя месту тому – Орини. В ту же гору вбегл Давид пророк из Иерусалима, от Саула царя.

О Раме

А от тоя горы к западу лиць есть две верьсте до Рамы, и о той Раме пророк Иеремея глаголеть: «Глас в Раме слышан бысть, плачь и рыдание во ушию ею, Рахиль плачющюся чад своих и не хотяше утешитися, яко не суть». И есть Рама та дебрь велика, и по дебри той седела села многа. И та земля вся около дебри тоа ныне зоветься Рама, и то есть область Вифлеемьскаа. И ту Ирод царь посла воя своа в Раму избить святых младенець.

О Ельмаусе

А от Рамы к западу лиць суть версты 4 до Елъмауса, и ту Христос в 3-тий день по въскресении явися Луце и Клеопе, идущима има от Иерусалима на село, и ту познася има Христос в преломлении хлеба. И есть ту было село то велико; на месте же том была церкви создана, ныне же есть разорено все от поганых и село то есть Елъмаус пуст. И есть сторонь пути того, за горою, было то, на правой руце тамо идуще от Иepycaлима к Яфу.

О Лидде

А от Елмауса до Лидды суть 4 версты, по полю все дойти Лидды. И ту есть был град велик велми, имя ему Лидда, ныне же зовется Рамбилий. И в той Лидде Петр ицелил есть Ению на одре лежаща.

О Опии

А от Лидды до Опии есть верст 10, все по полю ити. В том граде во Опии святый Петр апостол Тавифу въскресил. В том же граде постившю Петру на горници в 9 час, виде плащаницю с небеси cxoдящy, на 4 край повержено, и пришедшю до него, и възрев Петр и видев плащаницю ту исполнь сущу четвероногых и всякого гада. И рече ему глас с небеси: «Петре, встав, заколи и яжь! И рече Петр: – Господи, николиже скверно и нечисто вниде в уста моя. – И рече ему глас с небеси; «еже Бог очистил, ты не оскверняй». И на том месте ныне церкви создана во имя святого Петра. Есть же грядот Опия у моря близь и приходит море к стенам его, и тако ныне зовется градот Яф фряжьскиинем языком. А от Яфа до Тарсуфа есть верст 6.

О Кеесарии Филипове

А от Тарсуфа до Кесария Филиповы суть версты 24, все подле море ити. В той же Кесарии святый Петр апостол крестил Корнилия. Ту же есть близь гора, двою версту вдалее от града того на полудне лиць, и в той горе жил отець Маркиян, к нему же прииде жена блудница искусит его.

О Капернауме

А от Кесария Филиповы до Капернаума града есть верст 8. И есть Капернаум был град велик велми, и людий множество в нем было, ныне же есть пуст градот и есть близь моря великаго. И о том Капернауме глаголет пророк: «О горе тебе, Капернауме! Възнеслъся еси до небес и до ада снидеши. Из того бо града изити хотяшеть антихрист, да того ради ныне фрязи опустили суть весь градот Капернаум.

А от Капернаума до Карьмильския горы есть верст 6. И в той горе святый пророк «Илиа жил есть в пещере и той враном бысть той прекормлен Илия пророк; на той же горе жерьци Вавиловы исклал ножем и рече Илиа: «Ревнуя поревновах по Господи Бозе моем». И есть гора та Каръмильскаа высока велми, и море великое близь горы тоя, яко версты вдалее; от горы Кармильскиа до града до Кифы есть верста едина.

О Акре граде

А от Кифы до Акры есть верст 15. И есть градот Акра велик велми и тверд зданием, и лимень добр под градом тем есть; и то град есть Срациньский, ныне же фрязи держат. А от Акры до Тирова града есть верст 10, а от Тира до Сидона есть верст 10. И ту есть близь село Сареффа Сидонъскаа: в том селе Илиа пророк въскресил сына вдовича.

О Вирите граде

И от Сидона до Вирита града есть верст 15. В том граде жидове прободоша образ Христов копием, изиде кровь и вода; и тогда мнози вероваша и крестишася во имя Отца и Сына и Святаго Духа. И в то же град Вирит Ксенофонтова сына Иоанн и Аркадие пошъла бяста учить философии. А от Рита до Зевеля 20 верст; а от Зевеля до Триполя 40 верст; а от Триполя до реки Судии 60 верст.

О Велице Антиохии

На той бо реце есть Антиохия Великаа, и есть от моря подале Антиохиев град 8 верст, вдалее Адекия 100 верст, таже Малаа Антиохия, таже Канинорос, таже Мавронорос, таже Сатилия градок, таже Хидониа островець мал. И ти вси гради суть подле море да те грады вси минухом, по морю не приставающе, и приидохом близь к градом тем; боязни ради ратных не пристахом в Хилидонии. И оттуда идохом в Мира, таже к Патеру граду; и у того града сретоша нь Хусареве в 4-х галиах, и яша ны, и излупиша всех. А оттуда доидохом к Царюграду и доидохом по здраву Царяграда.

О Галилеи и о мори Тивириадьстм

И есть путь от Иерусалима в Галилею к Тивериадьскому морю, и к Фаорьстей горв, и к Назарефу; та бо земля около Тивириадьскаго моря вся зовется Галилея, и есть земля та от Иерусалима на летнш въсток лиць. И есть Тивириада град 4 дний вдалее от Иерусалима пешему человеку итти, и есть путь страшен вельми и тяжек зело: в горах каменных итти 3 дни, а четвертый день подле Иордан по полю итти все к всходу лиць, олне до верха Иорданова, отнюду же пойде Иордан река. И пригоди ми Бог путет исходити тако: пойде бо князь Иерусалимьский Балдвин на войну к Дамаску путем тем к Тивириадьскому морю, туда бо есть путь к Дамаску мимо Тивириадьское море; то аз уведах, оже хощеть князь путем тем к Тивириаде, идох ко князю тому и поклонихся ему и рекох: «и аз бых хотел пойти с тобою к Тивириадьскому морю, да бых походил святаа та мтста вся около Тивириадьскаго моря; да Бога деля пойми мя, княже!» Тогда князеть с радостию повеле ми пойти с собою и приряди мя к отроком своим. Тогда аз с радостию великою наях под ся. И тако проидохом места та страшная с вои царьскими без страха и без пакости; а без вои путем тем никтоже может пройти, но токмо святаа Елена путем тем ходила, а ин няктоже. Да се есть путь к Тивириаде: а от Иерусалима до кладязя святыя Богородица верст 10; а от кладязя того до Гельвуньских гор суть версты 4. И на тех горах Гельвуньских убиен бысть Саул, царь Июдейскый, и сын его Анафан туже убиен бысть; и суть же горы велики, камены, сухи, безводны; несть бо росы на них никогда же. А гор тех до кладязя Давидова есть верст две; а от кладязя того до пещеры Давидовы суть версты 4; в той пещере дал бяше Бог Саула царя в руце Давидови, и не уби его, оному спящу, но уреза скуть окройнища его и взя мечь его и покров ручный. А от тех гор до Сихемьских гор и до рова Иосифова суть версты 4; и на тех горах сынове Ияковли пасяху стада отца своего Иякова; на те горы ирииде Иосиф Прекрасный к братьи своей от отца своего послан к ним, нося им мир и благословение от отца своего Иякова; они же, видъвше брата своего Иосифа, вставше и яша и, и ввергоша и в ров, иже и до днешняго дне есть ровот, яко и стена глубока создана камением великым, и тверд вельми. И ту угоди ны ся ночьлег лежати на месте том; есть бо место то близь пути людскаго, на правой руце тамо идучи.

О кладязи Иаковли

И оттуда до вси Иосифовы, иже нарицаеться Сихарь, есть верст 10. И ту есть кладязь Ияковль, глубок и велик, и вода студена зело и сладка; и у того кладязя Христос беседовал сь женою Самарянынею; и ту лежахом ночьлег.

О Самарии

И ту есть близь град Самария яко полъверсты вдалее от кладязя того. Град же Самария велик есть вельми и обилен есть всем добром; градот Самария стоит межи двъма горама высокима, источници воднии мнози студени посреде града того текуть красно и древеса овощная без числа ту суть всяка: смокви, орешие и рожци, масличие, яко дубравы, яко леси суть по всей земли той около Самария, по краем нивы многоплодовиты суть по полем тем; и есть земля та около Самария красна и чюдна зело; и есть место то обильно всем добром, маслом и вином, пшеницею и овощем, и, просто рещ, оттуда есть жив Иерусалим всем добром. И т ныне град Самарийский зовется Неаполи. А оттуда есть место, двою версту к западу лиць от града Самария, имя месту тому Севастополи; и есть ту градок мал создан, и то есть темница святаго Иоанна Крестителя Христова; и в той темници усечен Иоанн Предтеча Христов от Ирода царя; и ту есть гроб святаго Иоанна Предтеча, и есть на мест том церковь создана добра во имя Предтеча Иоанна; и есть ныне ту монастырь Фряжьский, богат зело.

О Аримафеи граде

А оттуда есть 4 версты до Аримафея, и ту есть гроб святаго Иосифа и святаго Малелеиля. И есть место к западу лиць от Самария в горах, есть градок мал создан над местом; церкви добра клетьски создана над гробом святаго Иосифа; и то ся место зоветь Аримафей. А от Самариа путь есть к Тивириадьскому морю на въсток лиць на летний.

О граде Васаньсте

И есть от Самариа до Васана града верст 30. В том граде Васаньсте Ог царь Васаньский был, его же уби Иисус Навгин у Иерихона. И есть место то страшно и гроздно велми; исходит из градища того Васаньскаго 7 рек, и стоит тростие велико по рекам тем, и финици мнози стоят высоци по градищу тому, яко лес частый. И есть место то страшно и неудобь проходно: ту бо живуть Срацини силнии погании и биют на реках тех на бродех. И лвове мнози ту ся ражают; и есть бо место то близь Иордана реки и болоние велико приложить от Иордана к градищу тому Васаньскому, и ты реки текуть от Васана в Иордан; да тем лвове мнози суть в месте том. И ту есть близь под градом тем к востоку лиць, пещера дивна, крестным образом уродилася; из тоя пещеры изходит источник; и есть ту купель чюдна, сама уродилася и яко создана от Бога. В той купели сам Христос купался с ученики своими; и есть знати до днешняго дне место то, идеже Христос седел на камени; ту купахомся и мы грешнии недостойнии. В том же граде Васаньстем жидове искаху Христа, показаша ему кинис, и рекоша: «достоит ли дань дати или ни?» Рече же им: «чий есть образ и написание? Въздадите Кесарева Кесареви, а Божиа Богови!» И рече Христос, обращься к Петру: «иди верзи удину в море; юже преже имеши рыбу, разверзи уста ея, изми статир и вдай за мя и за ся!» У того же града Васана Христос ицели два слепца, иже зваста в след его идуща.

О Иордане реце

А от Васана до верха Иорданова и до мытници Матфеевы есть верст 20; и есть путет все по полю ити подле Иордан, пиюще Иорданову воду, сладка зело и чиста, все к восходу лиць ити оли до верха Иорданова. Иордан же пойде из моря Тивириадьскаго, от двою источнику кипит зело чюдно; имя источнику единому Иор, а другому имя источнику Дан; и оттуда пойде Иордан двема реками из моря Тивириадьскаго; и еста подале себе, яко трижды перестрелит межи има, и пойдета реце те разно себе мало, яко полъверсты вдалее, и потом сонметася обе реце в едину реку и то ся зоветь Иордан по имени двою источнику. Течеть же Иордан быстро и чисто водою, и лукаряво велми, и есть всем подобен Снове реце, в шире и в глубину, и болошем подобен есть Иордан Снове реце; и рыбы многи суть на верху его зело. И есть на самом верху Иорданове на обою потоку еста 2 моста камена, создана на комарах твердо велми, и под та моста течеть Иордан сквозе комары мосту тою.

О мытни Матфеове

От тою мосту близь была мытница Матьфиева, апостола Христова; ту бо ся сходять путье вси чрес Иордан к Дамаску и в Месопотамию. И ту в тою месту ста обедати князь Балдвин с вои своими; ту же и мы стахом с ним у самово верха Иорданова, купахомся на самом версе Иорданове в мори Тивириадьстем. И походихом тогда, около Тивириадьскаго моря, без страха и без боязни, вся та святаа места, куда же Христос Бог нашь походил своима ногама; туже и мене худаго и грешнаго сподоби Бог походити и видети всю ту землю Галилейскую, его же не надеяхомся николиже видети, то же ми показа Бог видети и обиходити ногама своима недостойныма и видех очима своима грешныма всю ту землю святую и желанную. Не ложно, по истине, яко видех, тако и написах о местех святых; мнози друзии, доходивше мест сих, не могоша испытати добр, блазнятся о местех сих, а инии, не доходивше мест сих, лжуть много и блядуть. Мне же худому Бог показа мужа свята и стара деньми, и книжна велми, и духовна, живша в Галилеи лет 30, а у святаго Савы в лавре живша лет 20, и тый ми мужь указа все по истине, от святых книг испытав добре; да что въздасть мне грешному толика добра видети? И ту стояхом у мосту тою весь день т, и к вечеру князь Балъдвин пойде за Иордан к Дамаску с вои своими мы же идохом в град Тивириадьский и ту пребыхом 10 дней в граде том, дондеже прииде князь Балъдвин с войны тоа от Дамаска; мы же дотоле походихом вся места та святаа около Тивириадьскаго моря.

О мори Тивириадстем

Тивириадьское есть море обиходичаво, яко озеро, и вода его сладка 3"вло инъстьсыти шюще воду ту; по дле же есть 50 верст, а в преки 20 верст. Рыбы же в нем много зело и ту есть рыба едина, дивна и чюдна зело, и ту рыбу Христос любил ясти, и есть сладка в ядь рыба та паче всякоя рыбы, образом же есть яко коропичь; и ях сам рыбу ту многажды, ту буда в граде; Туже рыбу и по въскресении Христос ял есть, егда прииде к учеником своим, ловящим им, и рече: «дети! имате ли что снедно» е Они же рекоша: «ни» и рече им: «верзите одесную страну мрежа».

О версе Иоарданове

И есть от верха Иорданова и от мосту тою до бани Христовы, и до бани святыя Богородица, и до бани апостольскиа, есть верст 6; а от бани святых до града Тивириады есть верста едина.

И есть был град Тивириада велик велми, две версте вдалее, а в шире версты, и есть подале море Тивириадьское. В том граде многа чюдеса створи Христос Бог нашь: ту бо есть место посреде града того, идеже Христос прокаженаго очисти; ту есть был дом тещи Петровы апостола и ту Христос вниде в дом тый, ицели от болезни огньныя тещю Петрову, и ту на том месте церкви создана во имя апостола Петра, кругла образом; ту есть и дом Симона прокаженаго был, идеже блудница на вечери омочи слезами нозе пречистеи Господа нашего Иисуса Христа и власы своими отре и прия отпущение бещисленных грех; и в том же граде и слукую жену ицели; ту же есть было сотниче чюдо; туже одр свесиша с болным отроком, покров прокопавше; ту же Ханаоныню помилова; ту есть пещера и вода в ней сладка зело и студена, в ту же пещеру Христос вбегл, егда хотеша и царя поставити в Галилеи; и ина чюдеса многа Христос створи в граде том. В том граде есть гроб Елисея пророка, сына Асафатова; туже есть близь при пути гроб Иисуса Навгина. И есть ту камень великь у моря близь, к стоку лиць, от града вдалее дострела; и на том камени стоял. Христос и ту учил народы, иже бяше пришли к нему от помория Тирьскаго и Сидоньскаго, и Декаполя, и от всея Галилея; и оттуда отпусти народы и ученики своя, идоша на ону страну моря в коряблих; и сам Иисус ту оста и последи оттуда преиде по морю, яко по суху, ходив ногама своима, и бысть обон пол моря пред народом; они же пришедше обретоша Иисуса, тамо ходяща,и глаголаша: «учителю, когда семо прииде?» Он же ре им: «от Бога вся возможна суть, а от человек невозможна». Есть верст 10 от Тивириады до того места по морю и есть место на пригории вдале от моря версты единоя.

Идеже Христос напита пять тысящь мужь

И есть место то равно и травно, и на том месте Христос питал народы 5 тысящь 5-ю хлеб, кроме жен и детий, и остася укрохов 12 коша.

Идеже Христос третее явися учеником своим, вста, от мертвых

И ту есть близь место под горою моря того Тивириадьскаго, и на том месте явися Христос учеником своим по въскресении третиее и прииде Христос и, ста при «езере, рече: «дети, имате ли что снедно»? Они же рекоша: «ни», и рече им Иисусъ: «възверзите одесную страны мрежа по глаголу моему и обрящете»; они же въвергоша и к тому не можаху еа привлещи от множества рыб, извлекоша на сухо мрежу, полну великых рыб 100 и 50 и 3, и видеша у мрежи огнь и хлеб, и рыбу печену, и ту яд Христос, прочее дасть им; ту создана есть церкви во имя святых апостол. А оттуда есть близь был дом Марии Магдалыни, ту ицели ю Христос от 7-ми бесов, и то ся место зоветь Магдалия.

О Вивсаиде граде

А оттуда есть близь в горе Вифсаида градок Андреев и Петров; и ту есть место, идеже приведе Нафанаила к Петрови и к Андрею.

Идеже Христос приде ко учеником, ловящим им рыб

И ту есть место на мори, идеже прииде Христос к Зеведееви и к Андрееви и к Петрови, они же влечаху мрежа и завязывяху; и ту познаста Христа Андрей и Петр, и ту остависта лодию и мрежа, идоста в след Христа; и ту сел был близь моря Зеведеева отца Иоаннова и ту есть был дом Богословца Иоанна; и ту Христос изгна человека легион бесов и повел им влести в свиния, и ту истопоша свиниа в мори. И ту есть близь село Капернаум.

А оттуда есть близь река велика и та река поиде изь езера Генисаритьскаго и входить река та в море Тивириадьское. Езеро же Генисаритское велико вельми, 40 верст в шире, всямокачно, кругло; рыбы в нем множество есть; и ту есть близь езера того град, имя ему Генисира, да потому ся тако зовет Генисаритьское.

О граде Декаполии>

И ту есть другий град велик зело, имя ему Декаполий; и ту есть место равно близь езера того, и на том месте Иисус стояше уча народы, пришедша от Декаполя и помория Тирьскаго и Сидоньскаго, о том бо месте в Еуангелии глаголет; и ина многа чюдеса сотвори Иисус около езера того.

О горе Ливанстей

И ту есть об он пол езера того, на летний всток лиць, гора высока вельми и велика зело, и снези на ней лежать чрез лето; имя горе той Ливан; на той горе ражается ливан и темиан былый. И с тоя бо горы Ливаньскыя идета 12 реце велице, и идеть 6 рек к встоку лиць, а 6 рек на уг лиць, и входят рекы ты в езеро Генисаритьское, а 6 рек идут к Велицей Антиохии; да то ся место зоветь Месопотамия, еже есть Средоречие; и ту есть межю теми реками Харъран, отнюду же изиде Авраам. От тех рек наполняется езеро Генисаритьское, вод мног, а из того езера идеть река велика в море Тивириадьское и умножаеться вода тою водою в мори Тивириадьстемь; а из моря того идеть Иордан, яко же и преже сказах о Иордане, то тако по истине есть. Горы же тоя Ливаньския не могох дойти ногами своими, страха ради поганых но сказаша ны добре о горе той, иже водяху ны Християне живущии тамо и не даша ны тамо ити к горе той Ливаньстей; много бо поганых ту живут в горе той; но токмо очима своима видели есмы гору ту и та места около езера того Генисаритьскаго. И есть же близь езера того от Тивириадьскаго моря, яко двою версту межи вдалее, есть на летний всток лиць от Тивириады езеро Генисаритьское.

О Фаворстей горе

Фаворьскаа же гора и Назареф от Тивириадьскаго моря на запад лиць, 8 верст великых до Фаворьскиа горы ити, токмо едину гору взити, а другую малу гору възлести, а ино все по полю ити, оли до Фаворьскиа горы ити. Фаворьская же гора чюдно и дивно, и несказанно, и красно уродилася есть от Бога, поставлено есть красно и высоко велми и велика; и есть посреди поля того краснаго, якоже стог кругол, гора та уродила ся есть красно и есть кроме всех гор подале; и течет река подле гору ту по полю доле; и есть по всей горе Фаворьсте росло древо всякое: смововь, рожьци и масличие много зело. Вышши же есть Фаворьскаа гора всех суши окрест ея, и есть уединена кроме всех гор, и стоит посреди поля красно зело, яко стог будеть гораздо зделан, кругло и высоко велми и велик ободом; възвыше есть якоже можеть 4-жды с нея стрелити, а еже гор на ню, то ни осмижды не может на ню въстрелити. Есть гора та вся камена, лести же на ню трудно и бедно велми по камению, луками на ню лести, путь тяжек велми: едва бо на ню възлезохом от 3-го часа до 9-го часа, борзо идуще, едва взидохом на самый верх горы тоя святыа. И есть же на самом версе горы тоя место высоко ко встоку лиць к зимнему, аки горка камена, мала, островерха; и на том месте преобразился есть Христос Бог нашь; и ту есть церкви добра создана на месте том во имя Преображениа а другаа, во имя святых пророк Моисия и Илии, подаль того места есть создана церкви на север лиць от Преображения.

О месте, идеже Христос преобрасися

Место же то святого Преображениа оделано есть около градом каменым твердо, врата же имать железна градот; и то есть первее было епископиа, ныне же есть монастырь латыньский. И есть пред градом тем полце красно уродилося на версе горы тоя; то есть чюдно и дивно Божие устроение, еже есть на толь высоце, иже вод быти ту; много бо воды есть на горе той на самом версе, то и нивы суть, и виногради добрии, и древеса овощнаа многа суть по горе той, и видети с нея далече вельми.

В пещере Мельхиселенове

Ту есть на той же горе Фаворстей пещера чюдна зело на равне, тако есть яко погребець мал в камснии иссечен, и оконце мало было на версе пещеры тоя святыя; трапеза создана дне в пещере той на всток лиць; дверци имать малы, слести же в пещеру ту по степенемь от запада лиць. И пред дверми же пещеркы тоя стоять смоквици малы, около ея стоят древца мала всякаа; первое же был лес велик ту около пещеры тоя, ныне же мала и худа древца суть ту. И в той пещерици жил святый Мелхиседек и ту пршле к нему Авраам и возва 3-жды, и рече: «человече Божий!» Изиде Милхиседек и изнесе хлеб и вино, и созда жертовник ту в пещере той, створи жертву хлебом и вином, и абие взяться жертва на небеса к Богу; и ту благослови Мельхиседек Авраама, и остриже и Авраам и обреза нокти его, и бе бо космат Мелхиседек; и то бысть начаток литургиам хлебом и вином, а не опресноком; о том пророк глаголеть: «ты еси иерей в векы по чину Мельхиседекову. И есть пещерка та вдаль от Преображениа, яко дострелять добре, и есть к западу лиць место то святое. И ту почьстиша ны добре в манастыри том у святого Преображенья, и ту обедахом; и, опочивше добре и вставше, идохом в церковь святого Преображения и поклонихомся на месте святемь, идеже преобразися Христос Бог нашь, и, облобызавше место то святое с любовию и радостию великою и вземше благословение от игумена и от всее братии, изидохом из манастыря того святого и обиходивше вся места святаа по всей горе той святей. Туда бо путь есть мимо пещеру ту Мелхиседекову к Назарефу. Назареф есть на запад лиць от Фавора. И второе паки любовно влезохом в пещеру ту святую и поклонихомся святей той трапезе, юже создал Мельхиседек со Авраамом; и есть до днешняго дне трапеза та в пещере той и ныне приходить ту святый Мелхиседек часто и литургисает в пещере той святей. И почивают вси вернии, иже ту живут, в горе той святе; ти же ми поведаша о том по истине. И похвалихом Бога, сподоблешаго нас, худых и недостойных, видети та святаа места и облобызати устнами недостойными. И прочее снидохом с горы Фаворски доловь на поля и идохом по полю две версте к Назарефу ва запад лиць. И есть от Фарьския горы до Назарефа 15 верст великых, по полю две версте, а 3 в горах, путь тяжек велмй и тесен зело непроходен: туды бо погании Срацини мнози седят в горах тех и по полю тому села суть многа Срациньская, и тии биють выходяще из сел тех в горе той страшной. И бедно ми ити в мале путем тем, ноли со многою дружиною, то тако может пройти путем тем без страха; нам же не пригодишася дружина. Но сами едини тако толко 8 нас и тоже худа и без оружия, на Бога надеющеся проидохом, Божиею благодатию храними и молитвами святыя Владычица нашея Богородица сблюдаеми, без пакости по здраву доидохом святого града Назрефа, идеже бысть святое благовещеше святей Госпожи Богородици от Ангела Гавриила, ту же и Христос въскормлен бысть.

О граде Назафе

Назарефь же градок мал есть в горах на удолне месте, да оли надшед над онь тоже узрети. И посреде градка того церкви создана велика вверх о трех олтарех; и, влезучи в церковь ту, на левей руце есть яко пещерка мала глубока пред малым олтарцем; имать же двери малы двои пещера та, едины дверци от запада, а другии дверци к встоку лиць; слести по степенем в пещеру ту и во обоих дверцих тех; влезучи в пещеру ту западными дверми, на правой руце есть келия создана, дверци малы имущи; и в той келийци жила святаа Богородица со Христомь, ту въскормлен бысть Христос в святой той храминци; и ту ложица его, идеже лежал Иисус, ту в келийци той ложицеею тако низко на земли создано.

О гробе Иосифа Обруч.

В той же пещере, западными дверми влезочи, на левей руце есть гроб святого Иосифа, обрученика Мариина; ту его Христос сам погребл своима рукама пречистыма. Исходить у гроба его от стены яко миро вода святаа бела и взимають на ицеление недужным.

О пещере, идеже седяше святаа Богородица

Ту есть место в той же пещере у дверей западных близь, на том месте седяше святаа Богородица при дверех тех близь и скаше кокнитъ, еже есть червленица; и ту прииде Гаврил Архангел, послан от Бога к девици Марии.

Идеже благовести Архангел светей Богородици

И ста пред нею, яви очи весть, подаль мало от места, идеже седяше Пречистаа Девица; яко 3-и столп вдале есть место то от дверей пещерных, идеже стояшее Гавриил; ту поставлена трепезка мала, кругла, мраморяна, об едином столпци; и на той трапезе литургисають.

О дому Иосифа обрученика

И ту есть был дом Иосифов, и где то есть пещера та святаа; все ся то деяло в дому Иосифове, обрученика Мариина, и ту есть церкви создана над пещерою тою святою во имя святого Благовещения. То было место святое опустело первее, ныне же Фрязи обновили место то суть и устроили добре; и есть ту епископ Латиньский, богат зело, и то владееть местом тем святым. И почьстиша нас добре питием, и ядением, и всем:, и лежахом ту нощь едину в градце том. И, почивше добре и заутра вставше, идохом в церковь ту и поклонихомся святому тому месту; и, вшедше в святую ту пещеру, и ту поклонимся святым тем местом всем. И изидохом из града того, и поидохом мало на летний всток лиць, и обретохом кладязь чюден, и глубок, и студен зело; и слести есть по степенем к воде той глубоко. И есть над кладязем тем создана церкви, во имя архангела Гавриила, и есть кругла образом.

О кладязи, идеже ангел первое благовести

Есть же от града Назарефа вдале, яко дострелити добре, до кладязя того святого; у того бо кладязя бысть первее благовещеше святей Богородици от архангела. Пришедши бо ей по воду и яко почерпе водонос свой, възгласи ей ангел невидимо, и рече: «радуйся; обрадованнаа, Господь с тобою!». Озревся Мария сюду и сюду, ни виде никого же, но токмо глас слыша, и, вземше водонос свой, идяше дивящися во уме своем, рекущи: «что се будеть глас, еже слышах, никого же не видех?» И вниде в Назарефь, и вниде в дом свой, и седе на прежереченномь месте и начат скати кокнит; и тогда явися архангел Гавриил яве, стоя на прежереченном месте, тогда ей благовести рождество Христово. И есть же от Назарефа до села Исавова 5 верст.

О Кани Галелейстей

А от села того до Кана Галилеи полторы версты. Кана Галиа же есть на людском пути и ту Христос воду в вино преложи. И ту обретохом дружину многу, идущу в Акру, и пристахом к ним с радостию великою, идохом с ним в Акру.

Акра же град есть был Срациньский, ныне же Фрязи держать. Есть же градокот Акра на велицем мори, и лимень под нимь добр велми; всем обилен есть градок. А от Назарефа до Акры есть верст 28 великих, есть же Акра к полуденью лиць от Назарефа. И ту пребыхом во Акре 4 дни, и опочивше ту добре, и обретохом дружину многу, идущю в святый град Иepyсалим, и пристахом к дружине той и поидохом с ними, с радостию веселящеся, и приидохом в Кайфу, а оттуда идохом к гореi Каръмильстей, и туда идохом. И ту есть в горе той пещера святого Илии пророка; и ту поклонихомся, а оттуда идохом в Капернаум. А от Капернаума, приидохом в Кесарию Филипову, и туда есть путь все итти подле великое море по полю, а другое по песком оли до Кесария. Ту пребыхом 3 дни в граде том Кесарийстем; и ту есть был Корнилие, его же Петр апостол крестил. А от Kecapиа идохом в Самарию; на лево от Кесария в Самарию путь есть в горы, есть верст 20 от Кесария до Самарии. И быхом другаго дне полудне в Самарии, но по тиху идуще и зноа ради и не можаху людие пеши ходити в зной; и ту нощь прележахом пред градом тем Самариею у кладязя Ияковля, идеже Христос беседова с женою Самарянынею.

О Ерусалиме

И оттуда вставше поидохом путем своим, им же бяхом пришли из Ерусалима, и доидохом святаго града Иерусалима с радостию великою по здраву; ничто же зла не видехом на пути сем, но все добро показа нам Бог видети очима своима вся святаа та места, куда Христос Бог нашь походил нашего деля спасения; туда же и нас грешных сподоби походити и видети святаа та места и чюдную ту землю Галилейскую видехом очима своима, всю землю Палестину Бог сподоби мя обиходити. И Божиею благодатию храними, и походихом без пакости, молитвами святыя Богородица съблюдаеми, и походихом всю Палестиньскую землю; та бо земля вся зовется около Иерусалима Палестина. Божиею помощию укрепляем, походих места та святаа, не видех нигдеже поганых, ни лютаго звери, ни пригоди ми ся видети иного зла ничто же, ни немощи малы не почютих в теле моем; но всегда, яко орел облегчеваем, Божиею благодатиею съблюдаем и силою Вышняго укрепляем. Аще и похвалити ми ся подобает, но силою Христа моего похвалюся; о немощи же моей похвалюся: сила бо моя в немощи свершается, апостол глаголет Павел. Да что въздам Господеви за вся, яже въздасть мне, худому и грешному и недостойному, толику благодеть видети и походити по святым сим местом и исполнити ми желаше сердца моего, его же есмь сподобился видети, то же ми показа Бог видети недостойному рабу и худому. Да простите мя, братие и отци и господие мои, и не зазрите худоумио моему, еже написах се не хитро, но просто, о местех сих святых, и о Иерусалиме, и о земли сей обетованной; обаче аще и не мудро написах, но не ложно; якоже видех очима своима, тако и написах.

О свете небеснем, како сходит ко гробу Господню

А се о свете святем, како сходит к гробу Господню, се ми Господь показа видети худому и недостойному рабу; и видех очима своима грешныма по истине, како сходит святый свет к гробу животворящему Господа нашего Иисуса Христа. Мнози бо странници неправо глаголють о схожении света святаго; ин бо глаголеть, яко святый Дух голубем сходит к гробу Господню; а друзии глаголють: молнии сходить с небесе и тако вжигаются кандила над гробом Господнимь. И то есть лжа и не правда: ничтоже бо есть не видети тогда, ни голубя, ни молнии, но тако невидимо сходит с небеси благодатно Божиею и вжигает кандила в гробе Господни; да и о том скажю, яко видех по истине. В великую пятницю по вечерни потирають гроб Господень и помывают кандила та вся, и вливають масла честнаго без воды, единого масла того токмо; и вотъкнувше светилна во оловца, и не вжигають светилен тех, но тако оставляють кандила та невожжена и запечатают гробь в 2 час нощи, и тогда изгасять вся кандила и свещи по всем церквам в Иерусалиме. Тогда аз худыи, недостойный, в ту пятницю, в 1 час дни идох к князю тому Балъдвину и поклонихся ему до земли. Он же, видев мя худаго, и призва мя к себе с любовию и рече ми: «что хощещи, игумене Русьский?» Познал мя бяше добре и люби мя велми, якоже есть мужь благодетен и смерен велми и не гордить ни мала. Аз же рекох ему: «княже мой! господине мой: Молю ти ся Бога деля и князей деля русских, повели ми, да бых и аз поставил свое кандило на гробе святемь от всея русьскыя земля!» Тогда же он со тщанием и с любовию повеле ми поставити кандило на rpoбе Господни и посла со мною мужа, своего слугу лучьшаго, к иконому святаго Въскресения и к тому, иже держить ключь гробный. И повелеста ми, иконом и ключарь святаго гроба, принести ми кандило свое с маслом. Аз же, поклонився има, пдох с радостию великою и купих кандило стькляно, велико вельми, и налиав масла честнаго все, принесох ко гробу Господню, уже вечеру сущу, упросих ключаря того, единого внутрь гроба сущи, и обестихся ему; он же отверзе ми двери святыя и повеле ми выступити из калигов и тако босого введе мя единого в святый гроб Господень и с кандилом, еже нося с собою, и повел ми поставити кандило на гробе Господни. Ипоставих своима рукама грешныма в ногах, идеже лежаста пречистеи нозе Господа нашего Иисуса Христа; в главах бо стояше кандило гречьское, на персех поставлено бяше кандило святаго Савы и всех монастырей; тако бо обычай имут, по вся лета поставляють кандило гречьское и святаго Савы. И благодетью Божиею та ся 3 кандила вожгоша тогда; а фряжьскаа каньдила повешена бяху горе, а от тех ни едино же възгореся. Аз же тогда, поставив кандило на гробе святемь и поклонився честному гробу тому и облобызав место то святое с любовию и с слезами, идеже лежало тело Господа на­шего Иисуса Христа, изидох из гроба святаго с радостию великою и идох в келию свою. Заутра же в великую суботу в 6 час дне сбираются вси людие пред церковь святаго Въскресениа, бещисленое множество народа, от всех стран пришелци и тоземци, и от Вавилона, и от Египьта, и от всех конец земли ту ся сбирають во т день несказанно множество; и наполнятся вся та места людий около церкви и около Распятиа Христова, и велика теснота и томление люте людем ту бываеть; мнози бо человеци ту задыхаются от тъсноты людий бещисленных; и ти людие вси стоят с свещами не вожженами и ждуть отверзениа дверий церковных. Внутрь же церкви тогда токмо попове едини суть и ждуть попове и вси людие дондеже прииде князь с дружиною; и тогда бывает отверзениа дверем церковным и входять людие в церковь в тесноте велице и в гнетении и наполняють церковь ту и полати вси полны будут; не могуть бо ся вместити вси людие в церковь ту, но ту стоять вне церкви людие мнози зело, около Голгофы и около Краниева места и до туда, идеже кресты налезени, и все то полно будеть людий бещисла много множество. И ти людие вси в церкви и вне церкве иного не глаголють ничтоже, но токмо «Господи, по­милуй!» зовут не ослабно и вопиють сильно, яко тутнати и гремети всему месту тому от вопля людий тех. И ту источници слезам проливаются от верных людий; аще бо кто окаменено сердце имать, но тогда можеть прослезити, всяк бо человек зазрит в себъ тогда и поминаеть грехи своя и глаголеть в собе всяк человек: «еда моих деля грехов не снидет свет святый?» И тако стоать вси вернии людие слезни и скрушенным сердцем и т сам князь Бадъдвин стоит с страхом и смирением великим; источници проливаются чюдно от очию его; такоже и дружина его около его стоят прямо гробу, близь олтаря великаго, вси бо сии стоят с смерением. И яко бысть 7 час дне суботнаго, тогда пойде Балъдвин князь ко гробу Господню и с дружиною своею, из дому своего, и вси бо сии пеши и присла в метохию святаго Савы и позва игумена того святаго Савы и с черници его. И пойде игумен с братиею к гробу Господню, и яз худый ту же поидох с игуменом тем и з братиею. И приидохом ко князю тому и поклонихомся ему вси; тогда и он поклонися игумену и всей братии и повеле игумену святаго Савы и мне худому близь себе пойти повеле, а иным игуменом и черньцем всем повеле пред собою пойти, а дружине своей повеле по заду пойти. И приидохом в церкви Въскресения Христова к западным дверем, и се множество людий заступили двери церковныя, и не могохом тогда в церковь внити; тогда князь Балдвин повеле воином, и разгнаша люди насилие и створиша яко улицю олне до гроба, и тако могохом пройти сквозь люди ольне до гроба. И приидохом к восточным дверем святаго гроба Господня, и князь по нас прииде и ста на месте своем, на десней стране у преграды великаго олтаря, противу всточным дверем и гробным; ту бо есть место княже, создано высоко. И повеле князь игумену святаго Савы стати над гробом с своими черньци и с правоверными попы; мене же худаго повеле поставити высоко над самыми дверми гробными, противу великому олтарю, яко дозрети ми лзе бяше в двери гробныя. Двери же ты гробныя всъ трои запечатаны бяху и запечатаны печатию царскою. Латиньстии же попове в велицем олтари стояху. И яко бысть 8 час дне и начаша вечернюю пети на гробе горе попове правовернии, и черноризци, и вси духовнии мужи, и пустынници мнози ту бяху; латина же в велицем олтари начаша верещати свойскы. И тако поющим им всем, аз ту стоях, прилежно зрях ко дверем гробным. И яко начяша чести паремии тоя суботы великиа, на первих пареми изиде епископ с дьяконом из великого олтаря и приде к дверем гробным и позре в гроб сквозе крестець дверей тех и не узре света в гробе, и възвратися опять; и, яко начаша чести 6-ю паремию, тот же епископ прииде к дверем гробным и не виде ничтоже. И тогда вси людие възпиша с слезами «Кирие, елейсон», еже есть «Господи, помилуй». И яко бысть 9-му часу мивувшю и начаша пети песнь проходную «Господеви поим», тогда внезаапу прииде туча мала от встока лиць и ста над верхом непокрытым тоа церкве, и дождь мал над гробом святымь и смочи ны добре стоящих на гробе; и тогда внезаапу восиа свет святый во гробе святемь, изиде блистание страшно и светло из гроба Господня святаго. И пришед епископ с 4-рми дияконы отверзе двери грогныя и взяша свещу у князя того, у Балдвина, и тако вниде в гроб и вожже свещу княжю епервее от света того святаго, изнесше же из гроба свещу ту и даша самому князю тому в руце его; и ста князет на месте своем, свещю держа с радостию великою, и от того вси свои свещи въжгохом, а от наших свещь вси людие вожгоша свои свещи, по всей церкви друг от друга вожгоша свещи. Свет же святы не тако, яко огнь земленый, но чюдно инако светится изрядно и пламянь его червлено есть, яко киноварь, и отнудь не сказанно светиться. И тако вси людие стоять с свещами горящими та вопиють вси людие велегласно «Господи помилуй!» с радостию великою и с веселием. Така бо радость не можеть быти человеку, ака же радость бывает тогда всякому християнину, видевши свет Божий святый; иже бо не видев тоа радости в т день, то не иметь веры сказающим о всем том видении; обаче мудрии и вернии человеци велми верують и в сласть послушають сказаниа сего и истины сеа и о местех сих святых. Верный в мале и во мнозе верен есть, а зло человеку, неверну, истина крива стваряються. Мне же худому Бог послух есть и святый гроб Господень, и вся дружина, Русьстии сынове, приключьшиися тогда во т день Ногородци и Кияне: Изяслав Ивановичь, Городислав Михаиловичь, Кашкича и инии мнози, еже то сведають о мне худом и о сказании сем. Но възвратимся на прежереченную повесть. Егда же свет восия в гробе святем, тогда же и пение преста и вси возпиша «Кирие, ейлейсон» и поидоша в церковь с свещама горящими и с радостию великою, сблюдающи свещи свои от угашения ветреняго, и идоша кождо их в свояси. И от того святаго света вжигают кандила в своих церквах и канчивають пение вечернее дома; а в велицей церкви, у гроба Господня, сами попове едини, без людий, канчивають пение вечернее. Тогда и мы, с игуменом и с братиею, в свой манастирь идохом, несуще свещи горящи, и ту кончахом пение вечернее и идохом в келии свои, хваляще Бога, показавша недостойным нам ту благодеть Божию видети. И на утрени в святую неделю отпевше заутренюю и бывшю целовашю с игуменом и с братиею, и отпущению бывшю в 1 час дне, и, вземше крест, игумен и вся братия, идохом к гробу Господню, поюще кондак сий: «аще и в гроб сниде, безсмертне!» И вшедше в святых и гроб животворящий, и облобызавше святый гроб Господень с любовию и со слезами теплыми, и насладившеся ту благоуханныя воня тоа святаго Духа пришествием, и кандилом тем еще горящим светло и чюдно. Та бо 3 кандила бяху вожьглися тогда, якоже поведа ны иконом и ключарь гроба Господня; ко игумену глаголаста оба доле стаащеа на гробе Господни та 3 кандила възгорестася, а иных 5 кадил висит над гробом, но горяху тогда, свет их инак бяше, не якоже онех 3-х кадил, изрядно и чюдно светится. И потом изыхом из гроба въсточными дверми и, вшедше в великый олтарь и ту створивше целование с правоверными и бывшу отпущение, игумен же и брат изыдохом из церкви святаго Въскресения и идохом во свой монастырь и ту опочивше до литургии. И по 3-ем дни Въскресения Господня, по литургии, идихом к ключареви гроба Господня и глаголах ему: «хотел бых взяти кадило свое». Он же, с любовию поим мя, введе в гроб одиного токмо. Аз же вшед в гроб и видех кадило свое, стояща на гробе святем и еще горяще светом тем святым, и, поклонився гробу тому святому и облобызав с любовию и слезами место то святое, идеже лежало тело Господа нашего Иисуса Христа пречистое, и тогда измерих собою гроб в дле и вшире и выше же, колико есть; при людех бо невозможно есть измерити его никому же. И почьстих гроба Господня по силе моей, яко мога, и тому ключареви подах нечто мало и худое благословение свое. Он же, виде любовь мою сущую к гробу Господню, и к тому ми удвигнув дощъку, сющую во главах гроба Господня святаго, и уят ми того святаго камени мало благословение и запретив ми с клятвою никому не поведати в Иерусалиме. Аз же, поклонився гробу Господню и ключареви и взем кандило свое с маслом святымь, изидох из гроба святаго с радо стию великою, обогатився благодатио Божиею и нося в руку моею дар святаго места и знамение святаго гроба Господня, и идох, радуяся, яко некако скровище богатьства нося, идох в келию свою радуяся великою радостию. И Бог тому послух и святый гроб Господень, яко во всех местех святых не забых имен князь Русскых и княгинь, и детей их, епископ, игумен, и боляр, и детей моих духовных, и всех хрисиан николиже не забыл есмь; но во всех святых местех поминал есмь, первее покланялъся есмь за князей за всех и потом о своих гресех помолился есмь. И о сем похвалю благаго Бога, яко сподоби мя худаго имена князей Рускых написати в лавре у святаго Савы, и ныне поминаются имена их во октении; с женами и с детьми их. Се же имена ихъ: Михаил Святополк, Василие Владимер, Давидь Святославичь, Михаил Олег Панъкратие Святославичь, Глеб Менский; токло есмь их помнел имен, да тех вписах, опроче всех князь Русскых и о болярех у гроба Господня и во всех местех святых. И отпехом литургии за князи Русскыя и за вся християны 50 литургий, а за усошпаа 40 литургий отпехом. Буди же всем, почитающим писание се с верою и с любовию, благословение от Бога и от святаго гроба Господня и от всех мест сих святых, приимут мзду от Бога равно с ходившиими места си святаа: блажени же видевше вероваша, треблажени не видевше веровавше; верою бо прииде Авраам в землю обетованную; по истине бо есть вера равна добрым делам. Бога ради, братие и господье мои, не зазрите худоумию моему и грубости моей; да не будет в похуление написание се, мене ради и гроба Господня и святых ради мест сих; кто любовию почтеть, да мьзду прииметь от Бога Спаса нашего Иисуса Христа, и Бог мира со всеми вами в веки. Аминь.

2-я пол. XI—XII в.

 О компании  Турагентствам  Новости  Подбор тура  Достопримечательности  Дайвинг  Горные лыжи  Круизы  Фитнес-туры  Club Med  Детский и молодежный отдых  Корпоративным клиентам  Авиа и ж/д билеты  Фотоальбомы  Отзывы туристов  Полезная информация  Памятки  Сертификаты  Как нас найти  Оплата картой


«АС-ТРЕВЕЛ» ООО
Туроператор, РТО 001262 в едином федеральном реестре туроператоров
Работаем в туризме с 1996 г.
Тел.: +7 495 740-29-89
Адрес: Вернадского просп., д. 37 корп. , Москва, 119415, Россия Координаты: 55.6781291,37.5101855
Мы работаем пн-пт: 10:00—19:00, сб: 11:00—14:00, выходной — вс
E-mail: , cайт: actravel.ru

ООО «АС-ТРЕВЕЛ» © 1996—2024